डोंबिवली एमआयडीसीत आग
दोन कंपन्या जळून खाक

डोंबिवली- डोंबिवली एमआयडीसी मधील खंबाळपाडामध्ये दोन कंपन्यांना बुधवारी भीषण आग लागली. या आगीमध्ये दोन्ही कंपन्या जळून खाक झाल्या. प्राज टेक्सटाइल आणि परफ्यूम बनवणारी रॅमसन्स अशी या कंपन्यांची नावे आहेत. घटनेची माहिती मिळताच अग्निशमन दलाच्या १० गाड्या घटनास्थळी दाखल झाल्या. अनेक तासांच्या प्रयत्नानंतर आगीवर नियंत्रण मिळवण्यात अग्निशमन दलाच्या जवानांना यश आले.
आग खूप मोठी असल्याने दोन्ही कंपन्या जळून खाक झाल्या. ही घटना बुधवारी रात्री १ च्या सुमारास घडली. सुदैवाने यात कोणतीही जीवितहानी झाली नाही. मात्र, खूप मोठे आर्थिक नुकसान झाले. विशेष म्हणजे या कंपन्यांच्या बाजूला गॅस पंप आणि नागरी वस्ती असल्याने त्या परिसराला मोठा धोका निर्माण झाला. आग विझवण्यासाठी कल्याण डोंबिवली मनपा, भिवंडी, उल्हासनगर, बदलापूर येथून अग्निशमन दलाच्या १० गाड्या दाखल झाल्या. अग्निशमन दलाकडून गॅस पंपाला थंड करण्यात आले. या पंपाकडे आग येऊ नये यासाठी अग्निशमन दलाने शर्थीचे प्रयत्न केले. आग नियंत्रणात आल्याने पुढील धोका टळला.