मुंबई – अभिनेत्री दिशा सॅलियन आत्महत्याप्रकरण पुन्हा चर्चेत आल्याने तिच्या आई-वडिलांनी आज मुंबईतील राज्य महिला आयोगाच्या कार्यालयात जाऊन आयोगाच्या अध्यक्षा रुपाली चाकणकर यांची आज भेट घेऊन चर्चा केली. दिशाबाबत माध्यमातून खोटी माहिती जाहीर करणार्‍या केंद्रीय मंत्री नारायण राणे, आमदार नितेश राणे आणि इतर सर्व संबंधितांविरुद्ध कारवाई करावी, अशी मागणी केली असल्याचे चाकणाकरांनी सांगितले.
या भेटीनंतर चाकणकर म्हणाल्या की, दिशाच्या आई-वडीलांनी आपल्या मुलीच्या मृत्यू पश्चात होणारी बदनामी ही त्यांच्यासाठी अत्यंत वेदनादायी असल्याचे आम्हाला संगितले. दिशाच्या मृत्यूबद्दल माध्यमातून खोटी माहिती जाहीर करणार्‍या नारायण राणे, नितेश राणे आणि इतर सर्व संबंधितांविरुद्ध कारवाई करावी, अशी मागणी आमच्या केली आहे. या मागणीची आयोगाने गंभीर दखल घेतली असून याबाबत सालियान कुटुंबियांना योग्य तो न्याय मिळवून देण्यासाठी आयोग कटिबद्ध असल्याचे चाकणकर यांनी सांगितले.
