लॉरिअलच्या उत्पादनात घातक रसायने?
शिकागोच्या कोर्टात 57 खटले दाखल

वॉशिग्टन : फ्रेंच कॉस्मेटिक कंपनी लॉरिअलच्या अडचणीत मोठी वाढ झाली असून या कंपनीवर 57 खटले दाखल करण्यात आली आहे. लॉरिअलसह अन्य कंपन्या केस सरळ आणि मऊ करण्यासाठी अनेक हानिकारक रसायनांचा वापर करतात, या कंपन्यांच्या उत्पादनांमुळे कर्करोग आणि इतर आजारांचा धोका असतो, असा दावा करत शिकागोच्या फेडरल कोर्टात याचिका दाखल करण्यात आल्या आहेत. त्यानंतर अमेरिकेच्या जिल्हा न्यायाधीश मेरी रोलँड यांनी कॉस्मेटिक कंपन्यांनी वापरल्या जाणाऱ्या रसायनांची चौकशी करण्याचे आदेश दिले आहेत.
कॉस्मेटिक कंपन्यांना या उत्पादनांमध्ये वापरल्या जाणाऱ्या धोकादायक रसायनांच्या हानीबद्दल माहिती होती, परंतु तरीही त्यांनी त्यांची विक्री सुरू ठेवल्याचा दावा खटल्यांमध्ये करण्यात आला आहे. ज्या कंपन्यावर आरोप केले जात आहेत. त्यामध्ये लॉरिअलची यूएस उपकंपनी, भारतातील गोदरेज सोन होल्डिंग्स इंक आणि डाबर इंटरनॅशनल लिमिटेडच्या सहायक कंपन्यांच्या प्रतिनिधींच्या नावांचा समावेश आहे.‘आपल्यावर केले जात असलेले आरोप बिनबुडाचे आहेत. आमच्या कंपनीच्या उत्पादनात कोणतेही हानीकारक रसायन वापरले जात नाही`असे म्हणत लॉरिअलने सर्व आरोप फेटाळून लावले आहेत.