पुणे
पुणे शहरातून निघालेल्या एका खाजगी बसचा अपघात झाला. ही घटना आज सकाळी ७ च्या सुमारास घडली. या अपघातात बसमधील ४ ते ५ प्रवासी जखमी झाले. या जखमी प्रवाशांना तातडीने रुग्णालयात उपचारासाठी दाखल करण्यात आले. सुदैवाने या अपघातात कोणतीही जीवितहानी झाली नाही. पुण्यातील काही प्रवाशांना घेऊन ही बस पुणे नगर महामार्गावरून अष्टविनायक दर्शनाला निघाली होती. रांजणगावच्या दिशेने जाताना लोणीकंद गावाजवळ हा अपघात झाला. चालकाचे नियंत्रण सुटल्याने बस पलटी झाली. यात प्रवासी जखमी झाले. घटनेची माहिती मिळताच लोणीकंद पोलीस घटनास्थळी दाखल झाले. त्यांनी या जखमींना लोहगाव शिक्रापूर आणि वाघोली येथील रुग्णालयात दाखल केले. त्यानंतर पोलिसांनी क्रेनच्या साहाय्याने बस बाजूला काढली.
