पणजी – गोवा सरकारने जे नवीन शॅक धोरण जाहीर केले आहे त्यात हा व्यवसाय करण्यासाठी व्यावसायिकांची कमाल वयोमर्यादा १८ ते ६० वर्षे ठेवल्याने संपूर्ण गोव्यातील शॅक व्यावसायिकांनी नाराजी व्यक्त केली आहे. गोव्यातील पारंपरिक शॅक व्यावसायिकांना या व्यवसायातून बाहेर फेकायचे, हे या सरकारचे कारस्थान असल्याचे संतप्त व्यावसायिकांनी म्हटले आहे. याचा जाब विचारण्यासाठी आम्ही उद्या पर्यटन संचालकांची भेट घेऊ, अशी माहिती गोवा शॅकमालक कल्याण संघटनेचे अध्यक्ष क्रुझ कार्दोज यांनी दिली.
क्रुझ कार्दोज यांच्या अध्यक्षतेखाली शनिवारी दक्षिण गोव्यातील काही शॅक व्यावसायिकांनी बाणावलीचे आमदार व्हेंझी व्हिएगस यांची भेट घेतली. यावेळी व्हिएगस यांनीही या धोरणाला आपला विरोध व्यक्त केला. ते म्हणाले की, सरकारने हे धोरण ठरविण्यापूर्वी किनारपट्टी भागातील आमदारांना विश्वासात घेण्याची गरज होती. स्थानिक व्यवसायिकांसाठी जाचक असलेल्या अटी बदलण्यात, याव्यात यासाठी पर्यटनमंत्री रोहन खंवटे यांची भेट घेऊन चर्चा करू.