मुंबई – मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी काल रात्री दिल्लीत केंद्रीय गृहमंत्री अमित शहा यांची दिल्लीत भेट घेतली. या भेटीनंतर आज सकाळी एकनाथ शिंदेंनी ट्वीट करून शिवसेना आणि भाजप आगामी सर्व निवडणुका एकत्र लढवणार असल्याचे या भेटीत ठरल्याचे जाहीर केले. त्यामुळे आगामी महापालिका, विधानसभा आणि लोकसभा निवडणुका दोन्ही पक्ष महायुती म्हणूनच लढणार, हे स्पष्ट झाले आहे. दोन्ही पक्षांत आगामी निवडणुकांमधील जागावाटपाबाबत दोन्ही पक्षांकडून अप्रत्यक्षरित्या वेगवेगळे दावे केले जात असतानाच शिंदे-फडणवीस यांनी हा महत्त्वाचा निर्णय घेतला आहे.
मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी रविवारी दिल्लीचा धावता दौरा केला. दोघेही काही तासांसाठीच दिल्लीत होते. तिथे त्यांनी केंद्रीय गृहमंत्री अमित शहा यांची भेट घेतली. त्यांची बैठक तब्बल सव्वा तास चालली. सोमवारी दिल्लीहून परतल्यावर एकनाथ शिंदे या भेटीबाबत ट्वीट करत म्हणाले की, रविवारी रात्री मी आणि उपमुख्यमंत्री यांनी दिल्लीत केंद्रीय गृह आणि सहकार मंत्री यांची भेट घेतली. कृषी, सहकार विभागाशी संबंधित विविध बाबींवर आम्ही चर्चा केली. राज्यात शेतकरी, महिला सक्षमीकरण अशा विविध क्षेत्रात गतीने कामे सुरू असून, अनेक रखडलेले प्रकल्प मार्गी लावले आहेत. राज्यातील विविध प्रकल्पांसाठी प्रधानमंत्री नरेंद्र मोदी यांचे नेहमीच मार्गदर्शन लाभले. सहकार विभागाशी संबंधित बाबींवर केंद्रीय सहकार मंत्री शहांचे आम्हाला नेहमीच मार्गदर्शन लाभत असल्याने आम्ही ही भेट घेतली.
शिंदे यांनी या ट्विटमध्ये असेही म्हटले की, राज्यात आगामी सर्व निवडणुका शिवसेना आणि भाजपने एकत्रितपणे लढविण्याचा निर्णयदेखील या बैठकीत घेण्यात आला. महाराष्ट्राच्या विकासासाठी आमची युती ही भक्कम असून, गेल्या 11 महिन्यांपासून आम्ही विकासाचे विविध निर्णय घेऊन त्याची अंमलबजावणी केली आहे. रखडलेले प्रकल्प मार्गी लावत आहोत. यापुढच्या काळात सर्वच क्षेत्रात महाराष्ट्राला देशात प्रथम क्रमांकाचे राज्य बनविण्यासाठी, विकासाची घोडदौड अशीच सुरू ठेवण्यासाठी आम्ही एकत्र निवडणुका लढवणार आणि बहुमताने जिंकणार आहोत.
गेले काही दिवस शिवसेना आणि भाजपमध्ये कुरबुरी चालू झाल्याची चर्चा आहे. आगामी निवडणुकांमधील जागावाटपावरून दोन्ही पक्षांतील नेते वक्तव्ये आणि दावे करत आहेत. हा विषय आगामी काळात वादाची ठरण्याची शक्यता बोलून दाखवली जात असतानाच आता शिंदे यांनी ही महत्त्वाची घोषणा केली आहे. अर्थातच, जागावाटपाविषयी दोन्ही पक्षांत अजून तरी कुठलाही फॉर्म्युला
ठरलेला नाही.