गुरुग्राम- मुंबई द्रुतगती मार्गावर नूह आणि गुरुग्राम येथे लवकरच नवीन धावपट्टी (एअरस्ट्रीप) बांधल्या जाणार आहेत. याबाबतचे निर्देश उपमुख्यमंत्री दुष्यंत चौटाला यांनी नुकत्याच झालेल्या बैठकीत दिले. चंदीगडमधील अधिकाऱ्यांना जिल्ह्यांमध्ये तसेच दिल्ली-जम्मू कटरा एक्स्प्रेस वेवर जिंद आणि कैथल जिल्ह्यांमध्ये नवीन एअरस्ट्रीप बांधण्याच्या सूचना दिल्या असून, यासाठी लवकरात लवकर आराखडा सादर करण्याच्या सूचनाही यावेळी देण्यात आल्या.
राज्यात ड्रोन निर्मितीचा तळ तयार करण्याची योजनाही विकसित करावी, असेही त्यांनी स्पष्ट केले. हिसार विमानतळाचे काम निर्धारित वेळेत पूर्ण करण्यासाठी वारंवार अपडेट देण्याचे निर्देश त्यांनी अधिकाऱ्यांना दिले. वास्तविक, उपमुख्यमंत्री यांच्याकडे नागरी विमान वाहतूक विभागाचाही कार्यभार आहे. अशा स्थितीत त्यांनी अधिकाऱ्यांची बैठक घेऊन संबंधित विभागाची संपूर्ण माहिती घेतली. चौटाला म्हणाले की, राज्यातील इतर सर्व एअरस्ट्रीपवर देखभाल दुरुस्तीचे काम सुरू करण्याचे निर्देश दिले. मान्सून ड्रेन, आयसोलेशन बे, व्हेईकल लेन, नेव्हिगेशन एड, सिक्युरिटी वॉच टॉवर, पेरिमीटर रोड यासह संबंधित कामांच्या प्रगतीचा उपमुख्यमंत्र्यांनी आढावा घेतला. अधिकार्‍यांनी सांगितले की १३२ केव्ही ईएचटी पॉवर लाईन्स हलवण्याचे काम सुरू आहे. विमानतळ परिसराचे काम प्रगतीपथावर असून ते लवकरच पूर्ण होईल.