नवी दिल्ली
काँग्रेसचे नेते राहुल गांधी ३० मेपासून तीन दिवसांच्या अमेरिका दौऱ्यावर जाणार आहेत. मात्र अखेरच्या क्षणी उद्भवलेला कायदेशीर अडथळा काँग्रेससाठी चिंतेचा विषय ठरला आहे. खासदार म्हणून अपात्र ठरल्यानंतर राहुल गांधी यांनी त्यांचे राजनैतिक पारपत्र सरेंडर केले. यांनतर सामान्य पारपत्र मिळण्यासाठी मागितलेल्या ना-हरकत प्रमाणपत्राबाबत दिल्लीचे एक न्यायालय आज निर्णय देणार आहे. त्यामुळे न्यायालयाच्या निर्णयावर राहुल गांधींचा दौरा अवलंबून असणार आहे.
दरम्यान, तीन दिवसांच्या या दौऱ्यात राहुल गांधी अनिवासी भारतीय समुदाय, उद्योजक आणि माध्यमांचे प्रतिनिधी यांच्याशी संवाद साधणार आहेत. या दौऱ्याच्या कार्यक्रमानुसार, राहुल हे सॅन फ्रान्सिस्को, वॉशिंग्टन डीसी आणि न्यू यॉर्क येथे दोन दिवस घालवणार आहेत. ३० मे रोजी सांता क्लॅरा येथील सांता क्लारा मॅरियटमध्ये ते अनिवासी भारतीय समुदायाशी संवाद साधणार आहेत.
