वर्धा – वर्धा- नागपूर मार्गावरील सेलू जवळ आज परिवहन महामंडळाच्या तीन एसटी बसचा विचित्र अपघात झाला. बसचा टायर पंक्चर झाल्याने बस थांबली असता, हा अपघात घडला. या अपघातात वाहन चालकासह २० प्रवासी जखमी झाले. ही घटना आज सकाळच्या सुमारास जंगलपूर फाट्याजवळ घडली.
परिवहन महामंडळाची नागपूर वरून वर्धेच्या दिशेने जाणाऱ्या एसटीचा टायर पंक्चर झाल्याने ती बस रस्त्याच्या कडेला उभी करण्यात आली होती. या बसमधील प्रवाशांना दुसऱ्या बसमध्ये पाठवण्यासाठी एक एसटी तेथेच थांबली असता, भरधाव वेगाने येणाऱ्या तिसऱ्या एसटीने उभ्या असलेल्या दोन एसटींना जोरदार धडक दिली. सेलू पोलिसांना अपघाताची माहिती मिळताच, पोलिसांनी घटनास्थळी धाव घेतली. त्यांनी जखमींना रुग्णालयात दाखल केले. या अपघातामुळे वाहतूक ठप्प झाली. मात्र, काही वेळाने ही विस्कळीत वाहतूक पुन्हा सुरळीत करण्यात आली.
