परभणी – शहरातील स्टेशन रोडवरून हिंगोली – परभणी ही शिवशाही बस स्थानकाकडे जात असताना एक महिला रस्ता ओलांडत असताना या बसखाली आली. या घटनेत महिलेचा जागीच मृत्यू झाला. आज गुरुवारी सकाळी साडेदहा वाजण्याच्या सुमारास ही घटना घडली.
परभणी रेल्वे स्थानकासमोर ही अपघाताची घटना घडली. ही महिला बसच्या उजव्या चाकाखाली आल्याचे काही प्रत्यक्षदर्शीनी पाहिले. बसचे चाक महिलेच्या अंगावरून गेल्यामुळे संपूर्ण शरीराचा चेंदामेंदा झाला होता. रस्त्यावर सर्वत्र रक्ताचा सडा पडला होता.अपघातानंतर परिसरातील नागरिकांनी मोठी गर्दी केल्याचे पाहायला मिळाले. त्यामुळे वाहतूक पोलिसांना गर्दी पांगवत वाहतूक सुरळीत करावी लागली. या दुर्देवी घटनेने परिसरात मोठी हळहळ व्यक्त केली जात आहे. मृत महिलेचे नाव उशिरापर्यंत कळू शकले. नवा मोंढा पोलीस ठाण्यात अपघाताचा गुन्हा दाखल करण्यात आला असून पुढील तपास सुरू आहे.
