ISRO EOS-09 satellite Mission | भारतीय अंतराळ संशोधन संस्थेला (ISRO) पृथ्वी निरीक्षण उपग्रहाचे (Earth observation satellite) प्रक्षेपण पूर्ण करण्यात अपयश आले. संस्थेने दिलेल्या माहितीनुसार, PSLV-C61 या रॉकेटच्या तिसऱ्या टप्प्यात तांत्रिक बिघाड (anomaly) आल्याने हे घडले. ही इस्त्रोची 101 वी मोहिम होती.
सतीश धवन अंतराळ केंद्रातून (Satish Dhawan Space Centre), श्रीहरिकोटा येथे सकाळी ५:५९ वाजता हे प्रक्षेपण झाले. हे या केंद्रातून होणारे १०१ वे प्रक्षेपण होते. प्रक्षेपणाच्या प्रयत्नानंतर ISRO चे अध्यक्ष व्ही. नारायणन (V. Narayanan) यांनी संक्षिप्त माहिती देताना सांगितले की, रॉकेटचे पहिले दोन टप्पे व्यवस्थित पार पडले.
नारायणन म्हणाले, “PSLV हे चार टप्प्यांचे वाहन आहे आणि दुसऱ्या टप्प्यापर्यंतचे कार्य सुरळीत झाले होते. तिसऱ्या टप्प्यातील मोटर व्यवस्थित सुरू झाली, पण त्याच्या कार्यादरम्यान आम्हाला एक निरीक्षण आढळले आणि त्यामुळे मोहीम पूर्ण होऊ शकली नाही.”
त्यांनी बिघाडाच्या स्वरूपाबद्दल अधिक माहिती दिली नाही, परंतु ते म्हणाले, “विश्लेषणानंतर आम्ही परत माहिती देऊ.”
या मोहिमेत EOS-09 हा पृथ्वी निरीक्षण उपग्रह होता. यात सिंथेटिक अपर्चर रडार प्रणाली आहे, जी कोणत्याही हवामानात, दिवसा आणि रात्री उच्च-रिझोल्यूशन चित्रे घेऊ शकते. हा उपग्रह कृषी देखरेख, वनीकरण, शहरी नियोजन, आपत्ती व्यवस्थापन आणि राष्ट्रीय सुरक्षा यांसारख्या विविध कामांसाठी उपयुक्त होता. EOS-09 हे EOS-04 या यशस्वी मोहिमेची पुनरावृत्ती होती, जे २०२२ मध्ये प्रक्षेपित करण्यात आले होते.
याचा उद्देश विविध क्षेत्रांतील वापरकर्त्यांसाठी रिमोट सेन्सिंग डेटाची वारंवारता आणि उपलब्धता सुधारणे हा होता. गेल्या डिसेंबरमध्ये स्पॅडेक्स मोहिमेनंतर, ISRO च्या नवीन पेलोड इंटिग्रेशन फॅसिलिटीमध्ये (Payload Integration Facility) तयार झालेले हे दुसरे PSLV होते.
