Animesh Kujur Record | भारताच्या दोन स्टार धावपटूंनी आपापल्या स्पर्धांमध्ये राष्ट्रीय विक्रम मोडले आहेत. युवा धावपटू अनिमेश कुजूरने ग्रीसमधील ड्रॉमीया आंतरराष्ट्रीय स्प्रिंट आणि रिले मीटमध्ये पुरुषांच्या 100 मीटर शर्यतीत 10.18 सेकंदांसह नवा राष्ट्रीय विक्रम नोंदवला आहे.
त्याचवेळी, मोहम्मद अफसलने पोलंडमधील मेमोरियल चेस्लावा सिबुलस्कीगो स्पर्धेत 800 मीटर शर्यतीत 1 मिनिट 44.96 सेकंदांसह राष्ट्रीय विक्रम मोडला. या कामगिरींमुळे भारतीय ऍथलेटिक्स जागतिक स्तरावर झळकले.
अनिमेश कुजूरची ऐतिहासिक कामगिरी
22 वर्षीय अनिमेश कुजूरने ग्रीसमध्ये पार पडलेले वर्ल्ड ऍथलेटिक्स कॉन्टिनेंटल टूर सिल्व्हर लेबल मीटमध्ये 100 मीटर शर्यतीत गुरिंदरवीर सिंगचा 10.20 सेकंदांचा राष्ट्रीय विक्रम मोडला. त्याने 10.18 सेकंदांची वेळ नोंदवत प्रथम स्थान पटकावले.
ग्रीसचा सोटीरिओस गारागानिस (10.23 सेकंद) आणि सॅमुली सॅम्युएलसन (10.28 सेकंद) अनुक्रमे दुसऱ्या आणि तिसऱ्या स्थानी राहिले. अनिमेशच्या नावावर आता 100 आणि 200 मीटरचे राष्ट्रीय विक्रम आहेत, यापूर्वी त्याने मे 2025 मध्ये दक्षिण कोरियात 200 मीटरमध्ये 20.32 सेकंदांचा विक्रम नोंदवला होता.
मोहम्मद अफसलचा 800 मीटरमधील मापदंड
29 वर्षीय मोहम्मद अफसलने पोलंडमधील पॉझ्नान येथे 800 मीटर शर्यतीत 1 मिनिट 44.96 सेकंदांची वेळ नोंदवत स्वतःचा राष्ट्रीय विक्रम मोडला. तो 1 मिनिट 45 सेकंदांपेक्षा कमी वेळेत धावणारा पहिला भारतीय ठरला.
यापूर्वी मे 2025 मध्ये त्याने जिन्सन जॉन्सनचा 1 मिनिट 45.65 सेकंदांचा विक्रम मोडला होता. पोलंडच्या मॅसिज वायडर्का (1:44.23), फिलीप ऑस्ट्रोस्की (1:44.25) आणि पॅट्रिक सिएराद्झकी (1:44.56) यांनी पहिल्या तीन स्थाने पटकावली.
