Sabih Khan | भारतीय वंशाचे तंत्रज्ञान क्षेत्रातील दिग्गज सबीह खान (Sabih Khan) यांची ॲपल (Apple) इंकच्या चीफ ऑपरेटिंग ऑफिसर (COO) पदी नियुक्ती झाली आहे. गेल्या तीन दशकांपासून ॲपलशी जोडलेले खान या महिन्याच्या अखेरीस जेफ विल्यम्स यांच्याकडून सूत्रे स्वीकारतील.
ॲपलचे सीईओ टिम कुक यांनी खान यांना “प्रतिभावान रणनीतीकार” आणि “पुरवठा साखळीचे मध्यवर्ती शिल्पकार” असे संबोधत कौतुक केले.
सबीह खान कोण आहेत?
1966 मध्ये उत्तर प्रदेशातील मोरादाबाद येथे जन्मलेले खान वयाच्या 10 व्या वर्षी सिंगापूरला स्थलांतरित झाले. त्यांनी टफट्स विद्यापीठातून अर्थशास्त्र आणि यांत्रिक अभियांत्रिकीची पदवी, तसेच रेन्ससेलर पॉलिटेक्निक इन्स्टिट्यूटमधून यांत्रिक अभियांत्रिकीची पदव्युत्तर पदवी मिळवली.
1995 मध्ये ॲपलमध्ये प्रवेश केल्यानंतर त्यांनी जागतिक पुरवठा साखळी, उत्पादन, लॉजिस्टिक्स आणि गुणवत्ता नियंत्रणात महत्त्वाची भूमिका बजावली. 2019 मध्ये ते ऑपरेशन्सचे वरिष्ठ उपाध्यक्ष बनले, जिथे त्यांनी ग्रीन मॅन्युफॅक्चरिंग आणि कर्मचारी संरक्षण उपक्रमांचे नेतृत्व केले.
टिम कुक यांचे कौतुक
कुक यांनी ॲपलचा कार्बन फूटप्रिंट 60 टक्क्यांहून अधिक कमी केल्याबद्दल खान यांचे कौतुक केले होते. त्यांनी नमूद केले की, 59 वर्षीय खान यांनी ॲपलचे उत्पादन सुधारण्यासाठी आणि अमेरिकेत त्याचा विस्तार करण्यासाठी नवीन तंत्रज्ञान आणि अत्याधुनिक पद्धती सादर केल्या आहेत.
