What is Zoho: भारताला तंत्रज्ञानाच्या क्षेत्रात आत्मनिर्भर बनवण्यासाठी केंद्र सरकारकडून विशेष प्रयत्न केले जात आहेत. याच दिशेने एक महत्त्वाचे पाऊल उचलत केंद्रीय मंत्री अश्विनी वैष्णव यांनी कामासाठी भारतीय बनावटीचा ‘झोहो’ (Zoho) प्लॅटफॉर्म वापरण्याची घोषणा केली आहे.
कागदपत्रे, स्प्रेडशीट आणि प्रेझेंटेशनसाठी ते आता मायक्रोसॉफ्टच्या ऑफिस सुइटऐवजी झोहोचा वापर करणार आहेत. पंतप्रधानांच्या ‘स्वदेशी’ आवाहनाला प्रतिसाद देत त्यांनी हा निर्णय घेतल्याचे म्हटले आहे.
Zoho:काय आहे झोहो?
1996 मध्ये श्रीधर वेंबू (Sridhar Vembu) आणि टोनी थॉमस यांनी स्थापन केलेली झोहो कॉर्पोरेशन ही एक ‘सॉफ्टवेअर-अ‍ॅज-अ-सर्व्हिस’ (SaaS) कंपनी आहे. चेन्नईमध्ये मुख्यालय असलेली ही कंपनी व्यवसायिक वापरासाठी 55 हून अधिक क्लाउड-आधारित टूल्स पुरवते.
यामध्ये ईमेल, अकाऊंटिंग, एचआर, प्रोजेक्ट मॅनेजमेंट आणि सीआरएम (CRM) सारख्या सेवांचा समावेश आहे. जगातील 150 हून अधिक देशांमध्ये कंपनीचे 100 दशलक्षाहून अधिक ग्राहक आहेत.
झोहोचे ‘झोहो वर्कप्लेस’ (Zoho Workplace) आणि ‘झोहो ऑफिस सुइट’ (Zoho Office Suite) हे पॅकेजेस मायक्रोसॉफ्ट ऑफिस 365 (Microsoft Office 365) आणि गुगल वर्कस्पेस (Google Workspace) ला थेट स्पर्धा देतात.
झोहो का आहे सर्वोत्तम पर्याय?
केंद्रीय मंत्र्यांनी झोहोला प्राधान्य देण्यामागे काही प्रमुख कारणे आहेत. ‘मेड इन इंडिया’ उत्पादनांना प्रोत्साहन देण्यासोबतच झोहो अनेक पातळ्यांवर आपल्या प्रतिस्पर्धकांपेक्षा वेगळी आहे.
- डेटा गोपनीयता: झोहो जाहिरातींवर आधारित महसूल मॉडेल वापरत नाही, ज्यामुळे ग्राहकांच्या डेटाची गोपनीयता जपली जाते.
- किंमत: मायक्रोसॉफ्ट आणि गुगलच्या तुलनेत झोहोचे प्लॅन स्वस्त आहेत, ज्यामुळे लहान आणि मध्यम उद्योगांमध्ये ते लोकप्रिय ठरले आहे.
सरकार आता स्वदेशी सॉफ्टवेअर, ॲप्लिकेशन्स आणि हार्डवेअरच्या विकासावर आणि वापराला प्राधान्य देत आहे. अश्विनी वैष्णव यांचा हा निर्णय ‘डिजिटल इंडिया’च्या (Digital India) दिशेने एक महत्त्वाचे पाऊल मानले जात आहे.
हे देखील वाचा – ‘लोक काय विचार करतात याची मला…’; भारताविरुद्धच्या सामन्यातील ‘गन गेस्चर’ सेलिब्रेशनवर पाकच्या खेळाडूचे स्पष्टीकरण
