Tata Capital IPO: देशातील मोठी वित्तीय संस्था असलेल्या टाटा कॅपिटलने (Tata Capital) आपल्या आगामी IPO साठी प्राइस बँड जाहीर केला आहे. या आयपीओमध्ये 10 रुपये फेस व्हॅल्यू असलेल्या शेअर्ससाठी 310 रुपये ते 326 रुपयांचा प्राइस बँड निश्चित करण्यात आला आहे.
टाटा कॅपिटलचा आयपीओ सर्वसामान्य गुंतवणूकदारांसाठी 6 ऑक्टोबर रोजी सबस्क्रिप्शनसाठी खुला होईल आणि 8 ऑक्टोबर रोजी बंद होईल. तसेच, अँकर गुंतवणूकदारांसाठी हा आयपीओ3 ऑक्टोबर रोजीच खुला होणार आहे.
गुंतवणुकीचे तपशील आणि लिस्टिंगची शक्यता
टाटा कॅपिटलच्या आयपीओचा लॉट साईज 46 इक्विटी शेअर्सचा आहे. याचा अर्थ गुंतवणूकदार कमीतकमी 46 शेअर्ससाठी अर्ज करू शकतात.
रिपोर्टनुसार, 29 सप्टेंबर रोजी टाटा कॅपिटलचा जीएमपी (ग्रे मार्केट प्रीमियम) 28 रुपये सुरू आहे. जर आयपीओमध्ये शेअर्सची किंमत 326 रुपये निश्चित झाली, तर सध्याच्या जीएमपीनुसार हा शेअर 8.6 टक्के प्रीमियमवर लिस्ट होऊ शकतो. मात्र, लिस्टिंगपर्यंत जीएमपीमध्ये बदल होऊ शकतो.
आयपीओ शेअर्सचे वाटप 9 ऑक्टोबर रोजी निश्चित केले जाईल आणि 10 ऑक्टोबर रोजी रिफंड सुरू होईल. त्याच दिवशी शेअर्स गुंतवणूकदारांच्या डिमॅट खात्यात जमा केले जातील. टाटा कॅपिटलचे शेअर्स 13 ऑक्टोबर रोजी BSE आणि NSE वर लिस्ट होण्याची शक्यता आहे.
मूल्यांकन कमी आणि राखीव शेअर्सची माहिती
टाटा कॅपिटलने आयपीओ बाजारात आणण्यापूर्वी आपल्या पोस्ट-मनी इक्विटी मूल्यांकनामध्ये 5 टक्क्यांची कपात केली आहे. आधी हे मूल्यांकन 16.5 अब्ज डॉलर (सुमारे 1,46,000 कोटी रुपये) होते, जे आता कमी होऊन 15.7 अब्ज डॉलर (सुमारे 1,39,000 कोटी रुपये) झाले आहे. त्यानुसार, इश्यूचा आकारही कमी करण्यात आला असून, आता तो 1.75 अब्ज डॉलर (सुमारे 15,540 कोटी रुपये) इतका असेल.
या आयपीओमध्ये पात्र संस्थात्मक खरेदीदारांसाठी (QIB) जास्तीत जास्त 50% शेअर्स, गैर-संस्थात्मक गुंतवणूकदारांसाठी (NII) कमीत कमी 15% शेअर्स आणि किरकोळ गुंतवणूकदारांसाठी (Retail Investors) कमीत कमी 35% शेअर्स राखीव ठेवले आहेत. याव्यतिरिक्त, 1,200,000 (12 लाख) इक्विटी शेअर्स कर्मचाऱ्यांसाठी आरक्षित आहेत.
हे देखील वाचा – पंतप्रधान मोदींच्या सभेत ‘ती’ एक चूक; थेट IAS अधिकाऱ्याला पदावरून हटवले
