India China Flights: गलवान खोऱ्यानंतर संघर्षानंतर पाच वर्षांच्या तणावानंतर संबंध हळूहळू सामान्य होत असताना भारत आणि चीनने थेट विमानसेवा पुन्हा सुरू करण्यावर सहमती दर्शवली आहे. याबाबतची घोषणा परराष्ट्र व्यवहार मंत्रालयाने (MEA)केली आहे.
परराष्ट्र मंत्रालयाच्या घोषणेनंतर भारतीय विमान कंपनी IndiGo ने येत्या 26 ऑक्टोबर 2025 पासून आपली सेवा पुन्हा सुरू करण्याची घोषणा केली आहे. या निर्णयामुळे दोन्ही देशांदरम्यान व्यापार, पर्यटन आणि लोकांशी संपर्क पुन्हा सुरळीत होण्यास मोठी मदत मिळणार आहे.
सेवा पुन्हा सुरू होण्याची कारणे आणि वेळापत्रक
भारताकडून IndiGo आणि चीनकडून चायना ईस्टर्न या दोन्ही कंपन्या थेट उड्डाणे पुन्हा सुरू करणाऱ्या पहिल्या कंपन्या असतील. 2020 मध्ये डोकलाम संकट (Doklam crisis) आणि त्यानंतर कोविड-19 महामारीमुळे ही सेवा खंडित झाली होती, पण आता ती पूर्ववत होत आहे.
IndiGo येत्या 26 ऑक्टोबर 2025 पासून कोलकाता ते ग्वांगझू (CAN) दरम्यान दररोज विनाथांबा (Non-stop) विमानसेवा सुरू करेल. IndiGo लवकरच दिल्ली आणि ग्वांगझू दरम्यानही थेट उड्डाणे सुरू करणार आहे. तसेच, टाटा समूहाच्या मालकीची एअर इंडिया (Air India) या वर्षाच्या अखेरीस दिल्ली ते शांघाय दरम्यान आपली विमानसेवा सुरू करण्याची शक्यता आहे.
परराष्ट्र व्यवहार मंत्रालयाच्या म्हणण्यानुसार, वर्षाच्या सुरुवातीपासूनच दोन्ही देशांच्या नागरी विमान वाहतूक प्राधिकरणांमध्ये ( थेट हवाई सेवा पुन्हा सुरू करण्याबद्दल आणि हवाई सेवा कराराच्या सुधारित मसुद्यावर तांत्रिक स्तरावर चर्चा सुरू होती.
द्विपक्षीय संबंध हळूहळू सामान्य करण्याच्या सरकारच्या दृष्टिकोनाचा हा एक भाग आहे. या चर्चेनंतर, हिवाळी हंगामाच्या वेळापत्रकानुसार ऑक्टोबर 2025 च्या अखेरीस थेट हवाई सेवा सुरू करण्यावर सहमती झाली आहे. ही सेवा दोन्ही देशांच्या वाहकांच्या व्यावसायिक निर्णयांवर आणि सर्व कार्यात्मक निकषांच्या पूर्ततेवर अवलंबून असेल.
दोन्ही देशांमध्ये संबंध सामान्य करण्याच्या दिशेने महत्त्वाचे पाऊल
गलवान संघर्षानंतर दोन्ही देशांमधील संबंध पूर्ववत करण्यासाठी उचललेले हे महत्त्वाचे पाऊल आहे. गेल्या वर्षभरात वास्तविक नियंत्रण रेषेवर (LAC) तणाव कमी करण्यासाठी लष्करी आणि राजनैतिक स्तरावर अनेक विश्वास निर्माण करणारी पाऊले उचलली गेली आहेत. यामध्ये उच्च-स्तरीय संवाद, व्यापारी निर्बंधांमध्ये शिथिलता आणि काही महिन्यांपूर्वी पर्यटन व्हिसा पुन्हा सुरू करण्याचा निर्णय यांचा समावेश आहे.
थेट विमानसेवा पुन्हा सुरू झाल्यामुळे सीमापार व्यापार, धोरणात्मक व्यावसायिक भागीदारी आणि पर्यटन क्षेत्राला नवी दिशा मिळेल, ज्यामुळे दोन्ही आशियाई महासत्तांमधील देवाणघेवाण पुन्हा सामान्य होण्यास मदत होईल.
हे देखील वाचा – दसरा मेळाव्यात एकनाथ शिंदेंचा महिलांना मोठा शब्द; ‘लाडकी बहीण योजने’बद्दल म्हणाले…
