Mumbai Metro: वरळी(Worli)येथील नेहरू सायन्स सेंटर स्थानकाचे नाव बदलून विज्ञान केंद्र(Nehru Science Centre)असे केल्यानंतर महाराष्ट्र काँग्रेसने (Congress)सोमवारी मुंबई मेट्रो प्रशासनाकडून उत्तर मागितले आहे. आणि ते भारताच्या पहिल्या पंतप्रधानांचे नाव पुन्हा द्यावे अशी देखील मागणी यावेळी करण्यात आली आहे.
एक्सवर पोस्ट करत मुंबई काँग्रेसचे मुख्य प्रवक्ते सचिन सावंत यांनी या संदर्भात संताप व्यक्त केला आहे. ते म्हणतात, संपूर्ण देशाला माहित आहे की वरळीतील परिसर नेहरू सायन्स सेंटर म्हणून ओळखला जातो. “तरीही, भाजपला नेहरू या नावाची ऍलर्जी आहे त्यामुळेच, त्यांनी जाणूनबुजून ते वगळले आहे आणि मेट्रो स्टेशनचे नाव फक्त विज्ञान केंद्र असे ठेवले आहे”
“हे अत्यंत आक्षेपार्ह आहे आणि माजी पंतप्रधान आणि जागतिक आदर्श भारतरत्न पंडित जवाहरलाल नेहरूजी यांच्या स्मृतीचा खोलवर अपमान त्यांनी केला असल्याचं सचिन सावंत यांनी म्हटले आहे. ज्यांच्या दृष्टिकोनातून भारताचा वैज्ञानिक दृष्टिकोन, औद्योगिक प्रगती आणि आधुनिक दृष्टिकोनाचा पाया रचला गेला. पुन्हा एकदा, हे कृत्य भाजपच्या क्षुद्र,असहिष्णु आणि सूडबुद्धीच्या मानसिकतेचा पर्दाफाश करते,” असे देखील सावंत म्हणाले.
काँग्रेस नेते म्हणाले की सरकार २०१३ च्या मसुद्याच्या अधिसूचनेचा संदर्भ देत आहे. “१२ वर्षे झाली आहेत आणि भाजपच्या नेतृत्वाखालील सरकारने मूळ नाव देखील बदलले आहे. नेहरूंचे नाव का वगळण्यात आले?” असे सवाल देखील विचारण्यात आले.
“त्यांनी यापूर्वी दिल्लीतील नेहरू मेमोरियल म्युझियम आणि लायब्ररीचे नाव बदलून पंतप्रधानांचे संग्रहालय केले आणि नेहरू युवा केंद्र संघटना (NYKS) चे नाव बदलून माय भारत असे ठेवले. त्याच वेळी, त्यांनी अहमदाबादमधील सरदार वल्लभभाई पटेल स्टेडियमचे नाव बदलून नरेंद्र मोदी स्टेडियम असे ठेवले,” असे सावंत यांनी त्यांच्या पोस्टमध्ये नमूद केले आहे.
पंडित जवाहरलाल नेहरू यांचे योगदान इतके स्मारकीय आणि अढळ आहे की भाजपने त्यांचा कितीही तिरस्कार केला किंवा त्यांच्या वारशाची बदनामी करण्याचा प्रयत्न केला तरी, असे प्रयत्न आकाशावर थुंकण्यासारखेच निष्फळ ठरतील,” असे देखील ते म्हणाले.
मुंबई मेट्रो रेल कॉर्पोरेशन (एमएमआरसी) शी संपर्क साधला असता त्यांनी सांगितले की २०१३ च्या अधिसूचनेत स्टेशनचे नाव सायन्स म्युझियम असे निश्चित करण्यात आले होते. “इमारतीचे खरे नाव सायन्स सेंटर असल्याने ते सायन्स सेंटर असे बदलण्यात आले,” असे एमएमआरसीने म्हटले आहे. नाव कधी बदलण्यात आले यासंबंधीच्या पुढील प्रश्नाचे उत्तर एमएमआरसीने अद्याप दिलेले नाही.
यावर विजय वडेट्टीवार यांनी देखील संताप व्यक्त केला आहे. त्यांनी एक्सवर या संदर्भात रोष व्यक्त केला आहे. ते म्हणतात नाव पुसल्याने इतिहास बदलत नाही…ज्यांना स्वतःचं कर्तृत्व दाखवता येत नाही, ते इतरांचं नाव पुसण्यातच समाधान मानतात. असं म्हणत त्यांनी सरकारला चांगलंच फटकारलं आहे.
हे देखील वाचा –
Samsung Galaxy Z Fold 6 वर बंपर डिस्काउंट! तब्बल 60 हजारांच्या डिस्काउंटसह खरेदी करा फोल्डिंग फोन
