Rohit Sharma Shubman Gill Popcorn Video: भारताने ऑस्ट्रेलियाविरुद्धचा पहिला एकदिवसीय सामना 7 विकेट्सनी गमावला. पावसामुळे 26 षटकांचा खेळवण्यात आलेल्या या सामन्यात, भारताची टॉप फलंदाजी फळी अपयशी ठरली.
पावसामुळे सामना थांबल्यानंतर ड्रेसिंग रूममध्ये नवा कर्णधार शुबमन गिल आणि त्याचे पूर्ववर्ती कर्णधार रोहित शर्मा पॉपकॉर्न खाताना दिसले, ज्याचा व्हिडीओ सोशल मीडियावर मोठ्या प्रमाणात व्हायरल झाला आहे.
पॉपकॉर्नवरून अभिषेक नायरचा गमतीशीर सल्ला:
पर्थ येथील ऑप्टस स्टेडियमच्या ड्रेसिंग रूममध्ये 19 ऑक्टोबर रोजी पावसामुळे खेळ थांबला होता. या वेळी शुबमन गिल पॉपकॉर्नघेऊन रोहित शर्माजवळ बसला होता. गिलने पॉपकॉर्न खाताना रोहितलाही पॉपकॉर्न शेअर करण्यासाठी टब पुढे केला आणि रोहितनेही ते घेतले.
हा व्हिडीओ पाहताच कॉमेंट्री करत असलेल्या टीम इंडियाचा माजी अष्टपैलू खेळाडू आणि प्रशिक्षक अभिषेक नायरने (Abhishek Nayar) लगेच गमतीने म्हटले, “अरे ए त्याला पॉपकॉर्न देऊ नकोस!”
अभिषेक नायरने यापूर्वी रोहित शर्माच्या फिटनेससाठी त्याच्यासोबत काम केले आहे. त्याने आयपीएल (IPL) नंतर रोहितला तब्बल 11 किलो वजन कमी करण्यात आणि फिटनेस सुधारण्यात मदत केली होती. त्यामुळेच नायरने लगेच रोहितला पॉपकॉर्नपासून दूर राहण्याचा विनोदी सल्ला दिला.
गिलने रोहितसोबत बसणे महत्त्वाचे:
शुबमन गिल रोहित शर्मासोबत बसून बराच वेळ चर्चा करताना दिसला. गिलने रोहित शर्माला आरामदायक वाटावे यासाठी केलेले प्रयत्न कौतुकास्पद असल्याचे नायर म्हणाले. ते म्हणाले, “माझ्या मते, शुबमन गिल रोहित शर्माला चांगले वाटावे यासाठी जो प्रयत्न करत आहे, तो वाखाणण्याजोगा आहे. गिल रणनीतीनुसार रोहितजवळ बसला असावा. जोपर्यंत तो त्याला पॉपकॉर्न देत नाही, तोपर्यंत तो योग्य करत आहे.”
रोहितच्या फिटनेसची चर्चा
ऑस्ट्रेलिया दौऱ्यावर रोहित शर्मा खूप तंदुरुस्त दिसत आहे. नायर यांनी सांगितले की, 2027 च्या विश्वचषकाला डोळ्यासमोर ठेवून रोहितने हे बदल केले आहेत. त्याने रोज 3 तास ट्रेनिंग घेतले आणि त्याची मानसिकता एका बॉडीबिल्डरसारखी होती. या सुधारित फिटनेसमुळे त्याला मैदानात वेगाने हालचाल करण्यास आणि अधिक चपळ बनण्यास मदत झाली आहे.
या सामन्यात रोहित शर्मा आंतरराष्ट्रीय क्रिकेटमध्ये पुनरागमन करत होता, मात्र तो 8 धावा करून जोश हेझलवूडच्या गोलंदाजीवर बाद झाला. तसेच कर्णधार म्हणून पहिल्यांदाच सलामीला आलेला शुबमन गिलही केवळ 10 धावा काढून बाद झाला होता.
हे देखील वाचा – शनिवारवाड्यातील नमाज पठणाचा व्हिडिओ व्हायरल; हिंदू संघटनांचे आंदोलन, केले जागेचे शुद्धीकरण
