Vote Chori Allegation: कर्नाटकमधील अलंद विधानसभा मतदारसंघातून समोर आलेल्या ‘मतदारांची नावे हटवण्याच्या’ गंभीर आरोपांवरून मोठा राजकीय भूकंप होण्याची चिन्हे आहेत. लोकसभेतील विरोधी पक्षनेते राहुल गांधी यांनी काही दिवसांपूर्वी ‘मत चोरी’चे आरोप केले होते. आता या प्रकरणाची चौकशी करणाऱ्या कर्नाटक एसआयटीने (SIT) तपासामध्ये धक्कादायक माहिती उघड केली आहे.
निवडणूक आयोगाकडे मतदारांची नावे डिलीट करण्यासाठी जे 6,018 अर्ज आले होते, त्या प्रत्येक अर्जासाठी एका डेटा सेंटरच्या ऑपरेटरला 80 रुपये देण्यात आले होते, असे एसआयटीच्या तपासात निष्पन्न झाले आहे.
चौकशीत उघड झाले व्यवहार
एसआयटीने दिलेल्या माहितीनुसार, 2023 च्या कर्नाटक विधानसभा निवडणुकीपूर्वी अलंद सीटवर बनावट मतदार डिलीट अर्जांसाठी एका डेटा सेंटरच्या संचालकाला 80 रुपये प्रति मतदार या दराने 6,018 मतदारांसाठी एकूण 4.8 लाख रुपये दिले गेले.
राहुल गांधी यांनी उपस्थित केलेल्या ‘मत चोरी’च्या आरोपांपैकी अलंद मतदार यादीतील अनियमितता हा एक महत्त्वाचा मुद्दा होता. एसआयटीने गेल्या आठवड्यात भाजप नेते सुभाष गुट्टेदार यांच्याशी संबंधित मालमत्तांवर छापा टाकला. गुट्टेदार हे 2023 मध्ये याच अलंद मतदारसंघात काँग्रेसच्या बी. आर. पाटील यांच्याकडून पराभूत झाले होते.
पडद्यामागील सूत्रधार
रिपोर्टनुसार, 26 सप्टेंबर रोजी एसआयटीने या प्रकरणाचा तपास हाती घेतला. कलबुर्गी येथील एका डेटा सेंटरला अर्ज जमा करण्याची जागा म्हणून निश्चित करण्यात आले होते. स्थानिक रहिवासी मोहम्मद अशफाक याचे प्राथमिक तपासात गुंतलेले असणे समोर आले. 2023 मध्ये चौकशी झाल्यावर अशफाकने इलेक्ट्रॉनिक उपकरणे देण्याचे आश्वासन दिले आणि तो दुबईला पळून गेला होता.
आता एसआयटीने इंटरनेट प्रोटोकॉल डिटेल रेकॉर्ड्स आणि अशफाककडून जप्त केलेल्या उपकरणांची तपासणी केली असता, तो मोहम्मद अक्रम, जुनैद, अस्लम आणि नदीम यांच्या संपर्कात असल्याचे आढळले.
गेल्या आठवड्यात एसआयटीने या चौघांच्या मालमत्तांवर छापे टाकले. या छाप्यात मतदारांच्या नावात हेराफेरी करण्यासाठी डेटा सेंटरचे संचालन आणि प्रत्येक डिलीटसाठी 80 रुपये दिले गेल्याच्या पुष्टी करणाऱ्या वस्तू जप्त झाल्या.
एसआयटीच्या अधिकाऱ्यांनी सांगितले की, त्यांनी मोबाईल फोनसह 7 पेक्षा जास्त लॅपटॉप जप्त केले आहेत आणि निधीच्या (Fund) स्रोताची चौकशी सुरू आहे. पोल्ट्री फार्ममध्ये काम करणाऱ्यांपासून ते पोलिसांच्या नातेवाईकांपर्यंत विविध लोकांचे 75 मोबाईल नंबर मतदारांच्या यादीतील बदलांसाठी वापरले गेले होते, असेही तपासात पुढे आले आहे.
हे देखील वाचा – भारताच्या अंतराळ कार्यक्रमाचे शिल्पकार, पद्मभूषण डॉ. एकनाथ वसंत चिटणीस यांचे 100 व्या वर्षी पुण्यात निधन
