Census 2027 : आगामी जनगणना 2027 च्या तयारीचा भाग म्हणून, देशातील सर्व राज्ये आणि केंद्रशासित प्रदेशांमध्ये 10 नोव्हेंबर ते 30 नोव्हेंबर या कालावधीत पूर्व-चाचणी घेतली जाणार आहे. महाराष्ट्रातून या नमुना चाचणीसाठी मुंबई, जळगाव आणि कोल्हापूर या 3 जिल्ह्यांची निवड करण्यात आली आहे.
महाराष्ट्रातील नमुना चाचणीचा तपशील:
- मुंबई: मुंबई महानगरपालिकेच्या एम-वेस्ट वॉर्डची निवड करण्यात आली आहे. यात चेंबूर पश्चिम आणि चेंबूर पूर्वमधील काही भागांचा समावेश आहे. एम-वेस्ट वॉर्डचे सहाय्यक आयुक्त शंकर भोसले यांनी दिलेल्या माहितीनुसार, चाचणीसाठी 135 ब्लॉक्स तयार करण्यात आले आहेत. घाटला परिसरातील काही भागांसह सुभाष नगरचा काही भाग यात समाविष्ट आहे. प्रत्येक ब्लॉकसाठी स्वतंत्र जनगणना अधिकारी नेमला जाईल.
- जळगाव: जळगावमधील चोपडा तालुक्यात 26 गावांमधून ही चाचणी घेण्यात येईल.
- कोल्हापूर: कोल्हापूरमधील गगनबावडा तालुक्यात 45 गावांमधून प्री-टेस्टिंग होईल.
जनगणनेचे टप्पे आणि तयारी:
जनगणना कायदा, 1948 च्या तरतुदीनुसार जनगणना आयोजित केली जाते. यापूर्वीची राष्ट्रीय जनगणना 2011 मध्ये झाली होती. केंद्र सरकारने जाहीर केल्यानुसार, जनगणना 2027 चे नियोजन खालील टप्प्यांत केले आहे:
पहिला टप्पा (घरांची यादी): एप्रिल ते सप्टेंबर 2026 दरम्यान एका महिन्याच्या कालावधीत ‘हाउस लिस्ट्स’ गोळा केली जाईल.
दुसरा टप्पा (लोकसंख्या जनगणना): फेब्रुवारी 2027 मध्ये प्रत्यक्ष लोकसंख्या जनगणना केली जाईल.
प्री-TESTING चा उद्देश:
या प्री-टेस्टिंगचा मुख्य उद्देश अंतिम जनगणनेसाठी यंत्रणा तयार करणे, येणाऱ्या संभाव्य समस्या समजून घेणे आणि जनगणना करणाऱ्या कर्मचाऱ्यांना प्रशिक्षण देणे हा आहे. या चाचणीसाठी राज्यात 402 जनगणना अधिकारी आणि पर्यवेक्षकांचे पथक काम करणार आहे.
मुंबईतील चाचणीच्या तयारीसाठी जनगणना संचालनालयाच्या संचालक निरुपमा डांगे यांनी बीएमसी आयुक्त भूषण गगराणी यांची मंगळवारी भेट घेतली. 3 ते 7 नोव्हेंबर या काळात जनगणना अधिकाऱ्यांचे प्रशिक्षण पूर्ण केले जाणार आहे.
हे देखील वाचा – Bihar Election : ‘मतांसाठी PM मोदी डान्सही करतील’; बिहार निवडणुकीत राहुल गांधींचा PM मोदींवर जोरदार हल्ला
