Digital Gold Investment : गेल्या काही वर्षांपासून ऑनलाइन ॲप्स (Online Apps) आणि वित्तीय तंत्रज्ञान प्लॅटफॉर्ममुळे डिजिटल गोल्डमध्ये (Digital Gold) गुंतवणूक करणे खूप सोपे झाले आहे. अनेक भारतीयांसाठी सोने ही नेहमीच पहिली आणि सर्वात सुरक्षित गुंतवणूक राहिली आहे, त्यामुळे घरबसल्या मोबाईलवरून सोने खरेदी करण्याची ही सुविधा अनेकांना आकर्षक वाटते.
मात्र, प्रत्येक चमकदार गोष्ट सोने नसते, हे समजून घेणे महत्त्वाचे आहे. डिजिटल गोल्डच्या या सोयीमध्ये अनेक छुपे धोके दडलेले आहेत, ज्याकडे दुर्लक्ष केल्यास गुंतवणूकदारांना मोठे नुकसान होऊ शकते.
डिजिटल गोल्ड काय आहे?
डिजिटल गोल्ड ही एक अशी योजना आहे, जिथे ग्राहक पैसे भरून वास्तविकतेत नसलेले सोने खरेदी करतात. या प्लॅटफॉर्म्सचा दावा असतो की, ग्राहक जेवढ्या प्रमाणात सोने खरेदी करतात, तेवढेच प्रत्यक्ष सोने त्यांच्याकडे सुरक्षित कोठारात साठवलेले असते. ग्राहकांना हवे असल्यास, पैसे काढण्याऐवजी सोन्याची डिलिव्हरी घेण्याचा पर्यायही मिळतो.
विशेष म्हणजे, अगदी 1 रुपयांसारख्या लहान रकमेतूनही यात गुंतवणूक सुरू करता येत असल्याने हा पर्याय लोकप्रिय झाला आहे. पण, हा प्रश्न उपस्थित होतो की ही गुंतवणूक सांगितली जाते तेवढी सुरक्षित आहे का?
डिजिटल गोल्डमध्ये लपलेले दोन मोठे धोके
छुप्या शुल्कांचा परिणाम: डिजिटल गोल्डमधील अनेक छुपे शुल्क गुंतवणूकदारांच्या अंतिम नफ्यावर थेट परिणाम करतात. अनेक प्लॅटफॉर्म सोन्याची साठवणूक, विमा आणि त्याची शुद्धता तपासण्याच्या नावाखाली वेगवेगळे शुल्क आकारतात. ही माहिती बऱ्याचदा लहान अक्षरात नमूद केलेली असते, जी गुंतवणूकदार सहसा वाचत नाहीत. परिणामी, जेव्हा विक्री करून परतावा मिळवण्याची वेळ येते, तेव्हा अपेक्षेपेक्षा खूपच कमी रक्कम हातात येते.
नियामक संस्थांचा अभाव: डिजिटल गोल्डची योजना कोणत्याही सरकारी नियामक संस्थेच्या अखत्यारीत येत नाही. म्हणजेच, भारतीय रिझर्व्ह बँक (RBI) किंवा SEBI (भारतीय प्रतिभूति आणि विनिमय बोर्ड) यांसारख्या मोठ्या संस्था यावर थेट नियंत्रण ठेवत नाहीत. जर तुम्ही ज्या प्लॅटफॉर्मवर गुंतवणूक केली आहे, तो अचानक बंद झाला किंवा त्यांचे ॲप एका रात्रीत कार्यान्वित होणे थांबले, तर गुंतवणूकदारांचे पैसे पूर्णपणे बुडू शकतात.
हे देखील वाचा – Chandrayaan 4 : चंद्रावरून माती घेऊन परत येणार! इस्रोच्या ‘चांद्रयान-4’ मोहिमेची तारीख जाहीर
