Al Falah University : अल-फलाह शिक्षण समूहाचे अध्यक्ष आणि विद्यापीठाचे संस्थापक जवाद अहमद सिद्दीकी यांना अंमलबजावणी संचालनालयाने (ED) अटक केली आहे. मनी लाँड्रिंगच्या गंभीर प्रकरणाची चौकशी 10 नोव्हेंबरच्या रेड फोर्ट स्फोटाशी संबंधित दहशतवादी निधीच्या दृष्टीनेही केली जात आहे.
फरीदाबादमधील या संस्थेवर तपास यंत्रणांचा संशय अधिक गडद झाला आहे. तपासकर्त्यांच्या माहितीनुसार, हे विद्यापीठ ‘व्हाईट-कॉलर’ दहशतवादी मोड्यूलचे केंद्रस्थान होते. सिद्दीकी यांच्या निवासस्थानी आणि विद्यापीठाच्या आवारात तपासणी केल्यानंतर पुराव्यांच्या आधारावर ही कारवाई करण्यात आली आहे.
बनावट मान्यता आणि फसवणुकीच्या FIRs दिल्ली पोलिसांच्या गुन्हे शाखेने दाखल केलेल्या दोन एफआयआरमुळे (FIRs) ईडीच्या चौकशीला गती मिळाली. अल-फलाह विद्यापीठाने NAAC ची बनावट मान्यता आणि UGC कायद्याच्या कलम 12(B) अंतर्गत अनुदानासाठी पात्र असल्याचा खोटा दावा करून विद्यार्थी आणि पालकांची दिशाभूल केल्याचा आरोप आहे.
UGC ने स्पष्ट केले आहे की विद्यापीठ केवळ राज्य खासगी विद्यापीठाच्या यादीत आहे आणि अनुदान मिळवण्यासाठी पात्र नव्हते.
ट्रस्टचा गैरवापर आणि शेल कंपन्या
सिद्दीकी हे 1995 मध्ये स्थापन झालेल्या अल-फलाह चॅरिटेबल ट्रस्टचे व्यवस्थापन पाहत होते. तपासानुसार, 1990 नंतर या संस्थांची भरभराट झाली, पण त्याला आर्थिक व्यवहारांची योग्य जोड नव्हती. तपासणीत असे उघड झाले आहे की, ट्रस्टच्या नावावर जमा झालेला कोट्यवधी रुपयांचा निधी सिद्दीकी यांच्या कुटुंबीयांशी संबंधित कंपन्यांना बांधकाम आणि केटरिंग करारांच्या नावाखाली वळवण्यात आला.
48 लाख रुपये रोख, डिजिटल साधने आणि महत्त्वपूर्ण कागदपत्रे तपास यंत्रणेने जप्त केली आहेत. समूहाशी जोडलेल्या अनेक ‘शेल कंपन्यां’ची (Shell Companies) ओळख पटली आहे.
दहशतवादी लिंकवर लक्ष
ईडी मनी लाँड्रिंगच्या पैशाचा वापर 10 नोव्हेंबरच्या रेड फोर्ट स्फोटातील आरोपींसाठी झाला होता का, याचा तपास करत आहे. या प्रकरणातील अनेक व्यक्ती विद्यापीठाशी जोडलेले आहेत. स्फोटात वापरल्या गेलेल्या हुंडाई आय-20 गाडीचा चालक डॉ. उमर नबी याच विद्यापीठात सहाय्यक प्राध्यापक होता. याशिवाय, फरीदाबाद दहशतवादी मोड्यूल प्रकरणात आधीच अटक झालेले डॉ. मुझम्मिल शकिल आणि डॉ. शाहीन सय्यद हे देखील याच संस्थेशी संबंधित आहेत.
हे देखील वाचा – मलिक यांच्याविरोधातील खटल्याचा मार्ग मोकळा
