Dr Babasaheb Ambedkar statue in UNESCO : भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांच्या पुतळ्याचे फ्रान्सची राजधानी पॅरिसमधील युनेस्को (UNESCO) मुख्यालयाच्या आवारात अनावरण करण्यात आले. देशात संविधान दिन साजरा होत असतानाच, ही घटना घडल्यामुळे जगभरातील भारतीयांसाठी हा अत्यंत गौरवाचा क्षण ठरला. हा भव्य पुतळा महाराष्ट्र राज्याच्या वतीने युनेस्कोला प्रदान करण्यात आला होता.
या महत्त्वपूर्ण समारंभाची माहिती मुख्यमंत्री देवेंद्र फडणवीस यांनी सोशल मीडियाच्या माध्यमातून दिली. त्यांनी सांगितले की, युनेस्कोचे महासंचालक खालिद अल-इनाय यांच्या हस्ते पुतळ्याचे अनावरण करण्यात आले. यावेळी भारताचे युनेस्कोतील स्थायी प्रतिनिधी विशाल शर्मा यांच्यासह अनेक मान्यवर उपस्थित होते.
पुतळ्याचे लोकार्पण हा संविधानाचा सन्मान
मुख्यमंत्री देवेंद्र फडणवीस यांनी युनेस्कोच्या सर्व अधिकाऱ्यांप्रती कृतज्ञता व्यक्त केली. आपल्या वक्तव्यात ते म्हणाले की, डॉ. बाबासाहेब आंबेडकरांनी त्यांच्या अलौकिक बुद्धिमत्तेने आणि कार्यामुळे जगाला समानता, बंधुता आणि सामाजिक बदलाची योग्य दिशा दिली.
संविधान दिनाच्या निमित्ताने जगातील सर्वात मोठ्या लोकशाही राष्ट्राला मिळालेल्या संविधानाबद्दल परमोच्च आदर व्यक्त करणारा हा क्षण आहे. डॉ. आंबेडकरांच्या पुतळ्याचे लोकार्पण याच दिवशी होणे, हे त्यांच्या उत्तुंग कर्तृत्वाचा सन्मान आहे. पंतप्रधान नरेंद्र मोदी यांनीही संविधान दिनानिमित्त देशाला पत्र लिहिले असून, भारताचे संविधान हे जगातील सर्वोत्कृष्ट संविधान असल्याचे मत मुख्यमंत्र्यांनी यावेळी व्यक्त केले.
आंबेडकरांचा वारसा पोहोचवण्याचा शासनाचा निर्धार
डॉ. बाबासाहेब आंबेडकर यांचे विचार आणि त्यांचा समृद्ध वारसा आंतरराष्ट्रीय स्तरावर पोहोचवण्यासाठी महाराष्ट्र शासन सातत्याने प्रयत्नशील आहे, असे मुख्यमंत्री फडणवीस यांनी स्पष्ट केले.
यापूर्वी लंडनमधील डॉ. आंबेडकरांचे निवासस्थान खरेदी करून त्याचे संग्रहालयात रूपांतर केले आहे. तसेच, जपानमधील कोयासान विद्यापीठातही त्यांचा पुतळा उभारला गेला आहे.
हे देखील वाचा – Commonwealth Games 2030 : भारतासाठी ऐतिहासिक क्षण! 2030 कॉमनवेल्थ गेम्सचे यजमानपद अहमदाबादकडे; पंतप्रधान मोदींनी दिल्या शुभेच्छा
