Bangladesh Violence Sharif Hadi Death : बांगलादेशातील कट्टरपंथी नेता शरीफ ओसमान हादी याचा सिंगापूरमधील रुग्णालयात उपचारादरम्यान मृत्यू झाल्यानंतर संपूर्ण देशात हिंसेचा वणवा पेटला आहे. हादीच्या मृत्यूची बातमी समजताच ढाका आणि इतर प्रमुख शहरांमध्ये हजारो आंदोलक रस्त्यावर उतरले.
३२ वर्षांचा हादी हा भारतविरोधी भूमिकेसाठी ओळखला जात होता. २०२४ मध्ये शेख हसीना यांच्या विरोधात झालेल्या विद्यार्थी आंदोलनात त्याने महत्त्वाची भूमिका बजावली होती. गेल्या शुक्रवारी ढाका येथे निवडणूक प्रचारादरम्यान अज्ञात हल्लेखोरांनी त्याच्या डोक्यात गोळी झाडली होती.
प्रसारमाध्यमांची कार्यालये लक्ष्यावर
हादीच्या मृत्यूनंतर संतप्त झालेल्या जमावाने बांगलादेशातील आघाडीची वृत्तपत्रे ‘द डेली स्टार’ आणि ‘प्रथम आलो’ यांच्या कार्यालयांना आग लावली. या आगीत अनेक कर्मचारी इमारतीमध्ये अडकून पडले होते. परिस्थिती इतकी गंभीर झाली की, या वृत्तपत्रांना आपली छपाई आणि ऑनलाइन सेवा तात्पुरती बंद करावी लागली आहे. आंदोलकांनी हादीच्या मारेकऱ्यांना तात्काळ अटक करण्याची मागणी करत शहराच्या विविध भागांत तोडफोड आणि जाळपोळ केली.
मोहम्मद युनूस यांची शांततेची हाक
बांगलादेशचे अंतरिम प्रमुख मोहम्मद युनूस यांनी देशाला उद्देशून भाषण करताना हादीचा मृत्यू ही लोकशाहीची मोठी हानी असल्याचे म्हटले आहे. १२ फेब्रुवारी रोजी होणारी सार्वत्रिक निवडणूक रोखण्यासाठीच हे मोठे षडयंत्र रचले गेल्याचा आरोप त्यांनी केला. सरकारने शनिवारी राष्ट्रीय शोक जाहीर केला असून हल्लेखोरांना पकडण्यासाठी ५ दशलक्ष टकांचे बक्षीस जाहीर केले आहे. युनूस यांनी नागरिकांना शांतता राखण्याचे आवाहन केले असून हिंसाचारामुळे निवडणुकीच्या मार्गात अडथळे येतील असा इशारा दिला आहे.
भारताकडून नागरिकांना महत्त्वाच्या सूचना
बांगलादेशातील वाढता तणाव पाहता ढाका येथील भारतीय उच्चायुक्तांनी भारतीय नागरिकांसाठी प्रवास मार्गदर्शक सूचना जारी केल्या आहेत. भारतीय नागरिकांनी स्थानिक प्रवास टाळावा आणि आपल्या निवासस्थानाबाहेर पडणे मर्यादित करावे, असे आवाहन करण्यात आले आहे. कोणत्याही आपत्कालीन परिस्थितीत भारतीय दूतावासाशी संपर्क साधण्याचे निर्देश देण्यात आले आहेत.
निवडणुकीपूर्वी बांगलादेशात अराजकता
शेख हसीना यांनी देश सोडल्यानंतर नोबेल विजेते मोहम्मद युनूस यांच्या नेतृत्वाखालील अंतरिम सरकार देश चालवत आहे. मात्र, आगामी निवडणुकांपूर्वीच कट्टरपंथी नेत्याच्या हत्येमुळे देशात पुन्हा एकदा अस्थिरता निर्माण झाली आहे. ढाकामध्ये पोलीस आणि निमलष्करी दलाचा मोठा बंदोबस्त तैनात करण्यात आला असला, तरी अनेक भागांत अद्यापही तणाव कायम आहे. १७ कोटी लोकसंख्या असलेल्या या देशात लोकशाही सुधारणांसाठी जनमत चाचणी देखील घेतली जाणार आहे, मात्र सध्याच्या हिंसाचारामुळे या प्रक्रियेवर प्रश्नचिन्ह उभे राहिले आहे.
हे देखील वाचा – 85 हजारांचा स्मार्टफोन 50 हजारात; Nothing Phone 3 वर आतापर्यंतची सर्वात मोठी ऑफर, पाहा फीचर्स
