Aravalli Mountain Protection : भारतातील सर्वात प्राचीन पर्वत रांगांपैकी एक असलेल्या अरवलीच्या संरक्षणावरून सध्या केंद्र सरकार आणि विरोधकांमध्ये जुंपली आहे. केंद्राने अरवलीतील संरक्षणाचे नियम शिथिल केल्याचा आरोप विरोधकांनी केला होता.
मात्र, केंद्रीय पर्यावरण मंत्री भूपेंद्र यादव यांनी हे सर्व दावे फेटाळून लावले आहेत. अरवलीचा जवळपास 90 टक्के भाग हा संरक्षित राहील आणि पर्यावरणाचा समतोल राखण्यासाठी सरकार कटिबद्ध असल्याचे त्यांनी स्पष्ट केले.
‘100 मीटर’च्या व्याख्येवरून संभ्रम
अरवलीच्या संरक्षणाबाबत सोशल मीडिया आणि काही यूट्यूब चॅनेलवरून चुकीची माहिती पसरवली जात असल्याचे भूपेंद्र यादव यांनी सांगितले. त्यांनी स्पष्ट केले की, अरवली पर्वताची व्याप्ती मोजताना जी 100 मीटरची मर्यादा सांगितली जाते, ती पर्वताच्या शिखरापासून तळापर्यंतच्या उताराची आहे. दोन पर्वत रांगांमधील रिकामी जागाही अरवलीचाच भाग मानली जाईल. या नवीन व्याख्येमुळे अरवलीचा जवळपास 90 टक्के भूप्रदेश हा संरक्षित क्षेत्राच्या कक्षेत येतो, ज्यामुळे पर्यावरणाचे रक्षण करणे अधिक सोपे होणार आहे.
खाणकामावर कडक निर्बंध
अरवलीमध्ये खाणकामाला मोठी मुभा दिल्याचा आरोपही मंत्र्यांनी खोडून काढला. त्यांनी सांगितले की, अरवलीचा एकूण विस्तार 1.47 लाख चौरस किलोमीटर आहे. त्यापैकी केवळ 217 चौरस किलोमीटर, म्हणजेच साधारण 2 टक्के भाग खाणकामासाठी पात्र ठरू शकतो.
मात्र, तिथेही सर्वोच्च न्यायालयाच्या आदेशानुसार शाश्वत खाणकाम आराखडा तयार करावा लागेल. त्यानंतर ‘आयसीएफआरई’ (ICFRE) या संस्थेची परवानगी घेतल्याशिवाय कोणतेही काम सुरू करता येणार नाही. विशेष म्हणजे, दिल्लीतील अरवली क्षेत्रात खाणकामावर पूर्णपणे बंदी कायम राहणार आहे.
विरोधी पक्षांचा आक्रमक पवित्रा
दुसरीकडे, काँग्रेस आणि समाजवादी पक्षाने सरकारच्या या भूमिकेला कडाडून विरोध केला आहे. समाजवादी पक्षाचे अध्यक्ष अखिलेश यादव यांनी सोशल मीडियावर पोस्ट करत इशारा दिला की, “जर अरवली वाचला, तरच दिल्ली हिरवीगार राहील.” अरवली हा दिल्ली-एनसीआर क्षेत्रासाठी एक नैसर्गिक कवच आहे. जर हे कवच नष्ट झाले, तर दिल्लीतील हवा प्रदूषण, वाढते तापमान आणि जैवविविधतेचे नुकसान रोखणे अशक्य होईल. प्रदूषणाचा सर्वाधिक फटका वृद्ध आणि बालकांना बसत असून दिल्लीचे भविष्य वाचवण्यासाठी अरवली वाचवणे हा पर्याय नसून संकल्प असायला हवा, असेही त्यांनी नमूद केले.
हे देखील वाचा – रांगडा लूक आणि दमदार परफॉर्मन्स! नवीन वर्षापूर्वी खरेदी करा Royal Enfield Bullet 350; किंमत झाली कमी
