Indian Railways Fare Hike : रेल्वेने प्रवास करणाऱ्या प्रवाशांसाठी एक मोठी बातमी आहे. भारतीय रेल्वेने प्रवासी भाड्यात वाढ करण्याचा निर्णय घेतला असून, नवीन दर लागू झाले आहेत. विशेष म्हणजे गेल्या ६ महिन्यांच्या कालावधीतील ही दुसरी भाडेवाढ आहे.
यापूर्वी जुलै महिन्यात भाडे वाढवण्यात आले होते, ज्यातून रेल्वेला ७०० कोटी रुपयांचा महसूल मिळाला होता. आताच्या या वाढीमुळे मार्च २०२६ पर्यंत रेल्वेच्या तिजोरीत अतिरिक्त ६०० कोटी रुपये जमा होतील, असा अंदाज रेल्वे अधिकाऱ्यांनी व्यक्त केला आहे.
अशी असेल नवीन भाडेवाढ:
रेल्वेने वेगवेगळ्या वर्गांसाठी किलोमीटरनुसार खालीलप्रमाणे दरवाढ केली आहे:
- ऑर्डिनरी क्लास (२१५ किमीच्या पुढे): प्रति किलोमीटर १ पैशाची वाढ करण्यात आली आहे.
- मेल/एक्सप्रेस (नॉन-एसी): प्रवासासाठी प्रति किलोमीटर २ पैसे जास्तीचे द्यावे लागतील.
- एसी क्लासेस (सर्व श्रेणी): एसी कोचमधील प्रवासासाठी प्रति किलोमीटर २ पैसे वाढवण्यात आले आहेत.
उदाहरणादाखल सांगायचे तर, जर एखादा प्रवासी नॉन-एसी कोचमधून ५०० किलोमीटरचा प्रवास करत असेल, तर त्याला आता १० रुपये अतिरिक्त द्यावे लागतील.
या प्रवाशांना दिलासा; भाड्यात बदल नाही:
काही विशिष्ट प्रवासासाठी रेल्वेने भाडेवाढ न करण्याचा निर्णय घेतला आहे:
- लोकल ट्रेन (Suburban): उपनगरीय गाड्यांच्या मासिक पासच्या (MST) दरात कोणतीही वाढ करण्यात आलेली नाही.
- कमी अंतराचा प्रवास: ऑर्डिनरी क्लासमधून २१५ किलोमीटरपर्यंतचा प्रवास करणाऱ्या प्रवाशांसाठी जुनेच दर लागू राहतील.
भाडेवाढ का करण्यात आली?
रेल्वे मंत्रालयाने दिलेल्या स्पष्टीकरणानुसार, गेल्या दशकात रेल्वेचे जाळे आणि ऑपरेशन्स मोठ्या प्रमाणावर विस्तारले आहेत. हे वाढते काम सांभाळण्यासाठी मोठ्या मनुष्यबळाची गरज आहे, ज्यामुळे खर्चात मोठी वाढ झाली आहे.
- रेल्वेचा मनुष्यबळ खर्च १,१५,००० कोटी रुपयांवर पोहोचला आहे.
- पेन्शनचा खर्च ६०,००० कोटी रुपये झाला आहे.
- २०२४-२५ मध्ये रेल्वेचा एकूण परिचालन खर्च २,६३,००० कोटी रुपयांपर्यंत वाढला आहे.
सुरक्षेमध्ये सुधारणा करणे आणि आधुनिक सोयीसुविधा पुरवण्यासाठी हा वाढीव खर्च भरून काढणे आवश्यक असल्याचे रेल्वेने म्हटले आहे. भारताने जगातील दुसऱ्या क्रमांकाची सर्वात मोठी मालवाहतूक रेल्वे म्हणून मान मिळवला असून, प्रवाशांची सुरक्षा अधिक सक्षम करण्यासाठी हे पाऊल उचलल्याचे निवेदनात नमूद केले आहे.
हे देखील वाचा – 365 दिवस टेन्शन फ्री! सरकारी कंपनीने लाँच केला 2799 रुपयांचा प्लॅन; दिवसाचा खर्च 8 रुपयांहून कमी
