Ladki Bahin Yojana eKYC Update : राज्यातील कोट्यवधी महिला ज्या मुख्यमंत्री माझी लाडकी बहीण योजनेच्या हप्त्याची प्रतीक्षा करत आहेत, त्यांच्यासाठी सरकारकडून महत्त्वाची माहिती समोर आली आहे. नोव्हेंबर आणि डिसेंबर महिन्याचे हप्ते अद्याप जमा न झाल्याने महिलांमध्ये चिंतेचे वातावरण आहे.
याच दरम्यान, महिला व बालविकास मंत्री अदिती तटकरे यांनी लाभार्थी महिलांना एक महत्त्वाचे आवाहन केले आहे. योजनेचा लाभ अखंडपणे सुरू ठेवण्यासाठी ई-केवायसी प्रक्रिया पूर्ण करणे अत्यंत आवश्यक असून, यासाठी आता केवळ शेवटचे काही दिवस उरले आहेत.
31 डिसेंबर ही अंतिम तारीख
योजनेत पारदर्शकता आणण्यासाठी सरकारने सर्व लाभार्थ्यांना ई-केवायसी करणे बंधनकारक केले आहे. यासाठी 31 डिसेंबर 2025 ही शेवटची तारीख निश्चित करण्यात आली आहे. ज्या महिला या मुदतीत आपली प्रक्रिया पूर्ण करणार नाहीत, त्यांचा पुढचा लाभ कायमचा बंद होण्याची दाट शक्यता आहे.
जर तुमच्या अर्जात किंवा ई-केवायसी प्रक्रियेत काही चूक झाली असेल, तर ती सुधारण्याची संधीही याच तारखेपर्यंत देण्यात आली आहे. यासाठी अधिकृत वेबसाईटवर जाऊन महिलांना स्वतःची पडताळणी पूर्ण करावी लागणार आहे.
खात्यात पैसे कधी जमा होणार?
नोव्हेंबर आणि डिसेंबर महिन्याचे पैसे अद्याप का मिळाले नाहीत, याचे मुख्य कारण म्हणजे राज्यातील 29 महानगरपालिकांच्या निवडणुकांसाठी लागू झालेली आचारसंहिता. या निवडणुकांसाठी 15 जानेवारी 2026 रोजी मतदान होणार असून 16 जानेवारीला निकाल जाहीर होतील. त्यामुळे निवडणूक प्रक्रिया पूर्ण झाल्यानंतर, म्हणजेच 17 जानेवारीनंतरच महिलांच्या खात्यात पैसे जमा होण्यास सुरुवात होईल. माहितीनुसार, नोव्हेंबर आणि डिसेंबर या दोन्ही महिन्यांचे मिळून एकूण 3000 रुपये महिलांना एकत्रित मिळण्याची शक्यता आहे.
52 लाख महिला अपात्र? मंत्र्यांनी दिले स्पष्टीकरण
काही रिपोर्टमध्ये 52 लाख महिला लाभार्थी अपात्र ठरल्याच्या बातम्या प्रसिद्ध झाल्या होत्या. मात्र, मंत्री अदिती तटकरे यांनी या बातम्यांचे खंडन केले आहे. “प्राथमिक छाननीत महिला अपात्र ठरल्याच्या बातम्या निराधार असून पडताळणीची प्रक्रिया अजूनही सुरू आहे,” असे त्यांनी स्पष्ट केले. ई-केवायसी प्रक्रियेमुळे केवळ पात्र महिलांनाच लाभ मिळावा, हा सरकारचा उद्देश असल्याचेही त्यांनी नमूद केले.
ई-केवायसी कशी करावी?
- सर्वात आधी योजनेच्या अधिकृत पोर्टलवर जा.
- होम पेजवर दिलेल्या ई-केवायसी लिंकवर क्लिक करा.
- तुमचा आधार क्रमांक आणि कॅप्चा कोड भरा.
- मोबाईलवर आलेला ओटीपी प्रविष्ट करून पडताळणी पूर्ण करा.
- प्रक्रियेदरम्यान मोबाईलवरून थेट फोटो (Live Photo) काढणे आवश्यक आहे.
वेळेत ही प्रक्रिया पूर्ण केल्यास महिलांना आगामी हप्त्यांपासून वंचित राहावे लागणार नाही.
हे देखील वाचा – Election 2026 : मुंबईत महायुतीत मोठी फाटाफूट! एकनाथ शिंदेंच्या सख्ख्या भाच्याने हाती बांधले ‘घड्याळ’; भाजप नेत्यालाही राष्ट्रवादीची उमेदवारी
