Rujuta Diwekar Winter Diet : हिवाळा सुरू झाला की आपण उबदार कपडे आणि गरम पेयांचा आधार घेतो. मात्र, शरीराला आतून उबदार ठेवण्यासाठी केवळ बाह्य उपाय पुरेसे नसतात, तर आपला आहारही तितकाच महत्त्वाचा असतो. प्रसिद्ध सेलिब्रिटी आहारतज्ज्ञ ऋजुता दिवेकर यांनी हिवाळ्याच्या दिवसांत निरोगी आणि उबदार राहण्यासाठी काही पारंपरिक भारतीय पदार्थांचे सेवन करण्याचा सल्ला दिला आहे.
करीना कपूर, आलिया भट्ट आणि वरुण धवन यांसारख्या कलाकारांना मार्गदर्शन करणाऱ्या ऋजुता दिवेकर यांनी आपल्या व्हिडिओमध्ये खालील पदार्थांचे महत्त्व अधोरेखित केले आहे:
1. बाजरीची भाकरी आणि लोणी
हिवाळ्यात बाजरी खाणे अत्यंत फायदेशीर मानले जाते. बाजरी उष्ण असल्याने ती शरीरात ऊर्जा निर्माण करते. ऋजुता दिवेकर यांच्या मते, बाजरीच्या भाकरीसोबत ताजे पांढरे लोणी खाल्ल्याने शरीराला चांगले फॅट्स मिळतात, ज्यामुळे थंडीत शरीराचे तापमान संतुलित राहण्यास मदत होते.
2. जवसाची चटणी
जवस म्हणजेच आळशीमध्ये ओमेगा 3 फॅटी ॲसिड मुबलक प्रमाणात असते. रोजच्या जेवणात पोळी किंवा भाकरीसोबत जवसाची चटणी खाल्ल्याने शरीराला आवश्यक पोषण मिळते आणि उष्णता टिकून राहते.
3. नाचणीची भाकरी
नाचणी किंवा रागी हा हिवाळ्यासाठी एक उत्तम धान्याचा पर्याय आहे. नाचणीची भाकरी नैसर्गिकरित्या उबदार असते, त्यामुळे कडाक्याच्या थंडीत हे एक उत्तम पौष्टिक जेवण ठरू शकते.
4. हुलग्याचे पराठे
हुलग्याला हिवाळ्यातील ‘सुपरफूड’ मानले जाते. हुलग्याचे पराठे केवळ चविष्टच नसून ते प्रथिनेयुक्त असतात. हे पराठे खाल्याने बराच वेळ भूक लागत नाही आणि शरीरातील ऊब टिकून राहते.
5. हुलग्याची डाळ
पराठ्याप्रमाणेच हुलग्याची डाळ किंवा पिठलं खाण्याचा सल्लाही ऋजुता दिवेकर देतात. ही डाळ शरीराला उष्णता देण्यासोबतच तुमची रोगप्रतिकारशक्ती मजबूत करण्यास मदत करते.
6. माठाची भाजी
हिवाळ्यात हिरव्या पालेभाज्यांचे सेवन वाढवणे गरजेचे असते. माठाची भाजी कोणत्याही मिलेट भाकरी किंवा डाळीसोबत उत्तम लागते. ही भाजी पचायला हलकी आणि लोहाने भरपूर असते.
ऋजुता दिवेकर यांचा सल्ला अगदी साधा आहे: आपल्या पारंपरिक आणि हंगामी खाद्यसंस्कृतीकडे वळा. हे पदार्थ केवळ चविष्ट नसून ते तुम्हाला नैसर्गिकरित्या निरोगी आणि उबदार ठेवतात.
