Neil Somaiya : उत्तर पूर्व मुंबईत आगामी महापालिका निवडणुकीच्या पार्श्वभूमीवर उमेदवारांनी सादर केलेल्या प्रतिज्ञापत्रांमधून अनेक महत्त्वाची माहिती समोर आली असून, यंदाच्या निवडणुकीत सर्वाधिक कोट्यधीश उमेदवार भाजपकडून मैदानात उतरल्याचे स्पष्ट झाले आहे. माजी नगरसेवक प्रकाश गंगाधरे, प्रभाकर शिंदे, रितू तावडे, नील सोमय्या यांच्यासह अनेक भाजप उमेदवारांच्या संपत्तीत गेल्या आठ वर्षांत लक्षणीय वाढ झाल्याचे चित्र दिसून येत आहे. २०१७ च्या तुलनेत २०२५ मध्ये या उमेदवारांची एकूण मालमत्ता अनेक पटींनी वाढल्याने राजकीय वर्तुळात चर्चेला उधाण आले आहे.
प्रभाग क्रमांक १०५ मधून निवडणूक लढवणाऱ्या भाजपच्या उमेदवार अनिता वैती या उत्तर पूर्व मुंबईतील सर्वाधिक श्रीमंत उमेदवार ठरल्या आहेत. त्यांच्या प्रतिज्ञापत्रानुसार त्यांच्याकडे एकूण २८ कोटी ७१ लाख रुपयांची मालमत्ता असून, यात स्थावर व जंगम मालमत्तेचा समावेश आहे. त्यांच्या संपत्तीचा आकडा पाहता त्या या निवडणुकीतील लक्षवेधी उमेदवार ठरल्या असून, मतदारांमध्येही त्यांच्या आर्थिक पार्श्वभूमीबाबत चर्चा सुरू आहे.
दरम्यान, प्रभाग क्रमांक १०४ मधून भाजपचे माजी नगरसेवक प्रकाश गंगाधरे पुन्हा एकदा निवडणुकीच्या रिंगणात उतरले आहेत. त्यांच्या प्रतिज्ञापत्रानुसार गंगाधरे यांची एकूण मालमत्ता १२ कोटी ८८ लाख ७६ हजार रुपयांपर्यंत पोहोचली आहे. यामध्ये ११ कोटी ३५ लाख रुपयांची स्थावर मालमत्ता असून, त्यांच्या नावावर तीन वाहने नोंदणीकृत आहेत. त्यापैकी इनोव्हा हायक्रोस या वाहनाची किंमत सुमारे ३८ लाख रुपये असल्याची माहिती देण्यात आली आहे.
विशेष म्हणजे, २०१७ च्या महापालिका निवडणुकीदरम्यान प्रकाश गंगाधरे यांनी केवळ २ कोटी ४७ लाख ८८ हजार ६४० रुपयांची मालमत्ता दाखवली होती. अवघ्या आठ वर्षांत त्यांच्या संपत्तीत झालेली ही मोठी वाढ अनेकांच्या भुवया उंचावणारी ठरली आहे.
प्रभाग क्रमांक १०५ मधून भाजपकडून उमेदवारी करणाऱ्या ६० वर्षीय अनिता वैती या दहावीपर्यंत शिक्षण घेतलेल्या असून, त्यांच्या प्रतिज्ञापत्रानुसार त्यांच्या कुटुंबाचे वार्षिक उत्पन्न ११ लाख ९४ हजार ७२२ रुपये आहे. वैती कुटुंबाची एकूण मालमत्ता २८ कोटी ८८ लाख १० हजार रुपये इतकी असून, त्यातील तब्बल २८ कोटी ७१ लाख रुपये ही स्थावर मालमत्ता असल्याची नोंद करण्यात आली आहे. त्यांच्या प्रचंड संपत्तीमुळे त्या उत्तर पूर्व मुंबईतील श्रीमंत उमेदवारांमध्ये आघाडीवर असल्याचे स्पष्ट झाले आहे.
दरम्यान, प्रभाग क्रमांक १०६ मधून भाजपचे ६७ वर्षीय माजी गटनेते प्रभाकर शिंदे पुन्हा एकदा निवडणूक रिंगणात उतरले आहेत. शिंदे यांच्या प्रतिज्ञापत्रानुसार त्यांच्या मालमत्तेत गेल्या काही वर्षांत लक्षणीय वाढ झाली आहे. २०१७ च्या महापालिका निवडणुकीवेळी त्यांनी ११ कोटी ९० लाख १ हजार २४५ रुपयांची एकूण मालमत्ता दर्शवली होती, तर सध्याच्या प्रतिज्ञापत्रानुसार त्यांची एकूण मालमत्ता १७ कोटी ६३ लाख रुपयांपर्यंत पोहोचली आहे. यामध्ये १० कोटी ५१ लाख ३७ हजार रुपयांची जंगम मालमत्ता असून उर्वरित हिस्सा स्थावर मालमत्तेचा आहे. तसेच त्यांच्या नावावर दोन वाहने, तर त्यांच्या पत्नीच्या नावावर एक वाहन नोंदणीकृत असल्याची माहिती देण्यात आली आहे.
उमेदवारांच्या प्रतिज्ञापत्रांतून समोर आलेल्या या आर्थिक तपशीलांमुळे उत्तर पूर्व मुंबईतील निवडणूक प्रचारात संपत्तीवाढ, पारदर्शकता आणि लोकप्रतिनिधींच्या आर्थिक पार्श्वभूमीचा मुद्दा अधिक ठळकपणे चर्चेत येण्याची चिन्हे दिसत आहेत.
दरम्यान, अनेक माजी नगरसेवक आणि नेत्यांच्या मालमत्तेत गेल्या आठ वर्षांत मोठी वाढ झाल्याचे प्रतिज्ञापत्रांतून समोर आले आहे. भाजपचे माजी खासदार किरीट सोमय्या यांचे पुत्र व माजी नगरसेवक नील सोमय्या प्रभाग क्रमांक १०७ मधून निवडणूक लढवत आहेत. उच्चशिक्षित असलेल्या नील सोमय्या यांच्या प्रतिज्ञापत्रानुसार त्यांची सध्याची एकूण मालमत्ता ९ कोटी ८९ लाख २१ हजार ८७२ रुपये इतकी आहे. यामध्ये ५ कोटी ७२ लाख ८० हजार रुपयांची जंगम मालमत्ता असून उर्वरित हिस्सा स्थावर मालमत्तेचा आहे. २०१७ च्या महापालिका निवडणुकीत त्यांनी अवघी १ कोटी ९९ लाख ३७ हजार ८०९ रुपयांची मालमत्ता दर्शवली होती, त्यामुळे त्यांच्या संपत्तीत झालेली वाढ लक्षणीय मानली जात आहे. याशिवाय त्यांच्या नावावर २२ लाख ६४ हजार रुपये किंमतीची महिंद्रा थार ही आलिशान गाडी असल्याचीही नोंद आहे.
शिवाय, प्रभाग क्रमांक १३२ मधून भाजपच्या उमेदवार आणि माजी नगरसेविका असलेल्या रितू तावडे यांचीही मालमत्ता वाढलेली दिसून येते. त्यांच्या प्रतिज्ञापत्रानुसार एकूण मालमत्ता ५ कोटी २६ लाख ६७ हजार रुपये असून, त्यांच्याकडे ४६ लाख ५० हजार रुपये किंमतीची टोयोटा फॉर्च्यूनर, एक हुंदाई कंपनीचे वाहन तसेच एक दुचाकी आहे. २०१७ मध्ये निवडणूक लढवताना त्यांनी ३ कोटी ५८ लाख ८३ हजार ५७४ रुपयांची मालमत्ता जाहीर केली होती. तसेच राष्ट्रवादी काँग्रेस (शरद पवार गट) मधून भाजपमध्ये प्रवेश केलेल्या राखी जाधव यांच्या प्रतिज्ञापत्रानुसार त्यांची एकूण मालमत्ता ३ कोटी ८० लाख ६८ हजार रुपये इतकी आहे.
उत्तर पूर्व मुंबईतील विविध प्रभागांमधील या उमेदवारांच्या प्रतिज्ञापत्रांमधून समोर आलेली संपत्तीची माहिती पाहता, निवडणुकीच्या पार्श्वभूमीवर राजकीय प्रतिनिधींच्या आर्थिक पार्श्वभूमीवर पुन्हा एकदा चर्चा सुरू झाली असून, मतदारांमध्ये पारदर्शकतेचा मुद्दा अधिक ठळकपणे पुढे येत आहे.
हे देखील वाचा – Borivali – Kandivali Megablock : कांदिवली–बोरिवलीवर मेगाब्लॉकचे सावट; लोकल गाड्या रद्द तर काही लोकल १५-२० मिनिटे उशिरा; प्रवासी मात्र हैराण
