Weight Loss Tips: आजच्या काळात वजन कमी करणे म्हणजे केवळ तासनतास जिममध्ये व्यायाम किंवा कडक डाएट असे मानले जाते. मात्र, या गोंधळात अनेकजण भूक आणि खाण्याच्या नैसर्गिक सवयींकडे दुर्लक्ष करतात.
वजन कमी करण्यासाठी अनेकदा महागड्या उपचारांची गरज नसते, तर केवळ शिस्त आणि काही साध्या बदलांची आवश्यकता असते. अडीच महिन्यात 10 किलो वजन कमी करण्यासाठी आरोग्य क्षेत्रातील तज्ज्ञांनी 3 प्रभावी पावले सुचवली आहेत.
स्टेप 1: सकाळचा नाश्ता आणि पोषक तत्वे
वजन कमी करण्याच्या प्रवासात शरीराला योग्य पोषण मिळणे अत्यंत गरजेचे आहे. दिवसाची सुरुवात प्रथिनांनी युक्त नाश्त्याने करणे फायदेशीर ठरते. यासाठी अंडी, मोड आलेली कडधान्ये किंवा डाळीचे धिरडे असे पर्याय उत्तम आहेत. यासोबतच शरीरातील पोषक तत्वांची कमतरता भरून काढण्यासाठी खालील घटक महत्त्वाचे ठरतात:
- रोज एक मल्टिव्हिटॅमिन.
- ओमेगा 3,6 – 1,000 mg दररोज.
- व्हिटॅमिन D (60,000 युनिट्स महिन्याला) आणि व्हिटॅमिन K2 दररोज.
- मॅग्नेशियम 200 mg दररोज.
स्टेप 2: घरच्या जेवणाचा आग्रह
वजन घटवण्यासाठी दुसरा नियम अतिशय स्पष्ट आहे – हॉटेलमधील जेवण किंवा बाहेरचे खाद्यपदार्थ पूर्णपणे टाळावे. तुम्ही जिथे कुठे जाल, तिथे घरून तयार केलेले अन्नच सोबत ठेवा.
जर घरी बनवलेले जेवण उपलब्ध नसेल, तर पुढच्या वेळेच्या जेवणापर्यंत प्रतीक्षा करणे उत्तम. जेवणाव्यतिरिक्त केवळ चहा, कॉफी आणि लिंबू पाणी घेण्यास हरकत नाही. हा बदल तुमची कॅलरी इनटेक मर्यादित ठेवण्यास मदत करतो.
स्टेप 3: किमान आणि हलका व्यायाम
बहुतेक वजन कमी करण्याच्या प्लॅनमध्ये कडक व्यायामावर भर दिला जातो, पण या पद्धतीत मात्र हलक्या व्यायामाचा सल्ला दिला आहे. केवळ हलके चालणे आणि योगासने पुरेशी आहेत. जास्त व्यायाम केल्याने भूक वाढते, ज्यामुळे खाण्यावर नियंत्रण राखणे कठीण होऊ शकते. त्यामुळे शरीराला थकवा न देता सक्रिय ठेवणे हे या पद्धतीचे मुख्य उद्दिष्ट आहे.
दोन महिन्यांच्या शेवटी, तुमचे ध्येय हेच असावे की, जेव्हा भूक लागेल तेव्हाच खावे आणि विनाकारण खाणे टाळावे. सवयींमधील हा बदल दीर्घकाळ वजन नियंत्रणात ठेवण्यासाठी मदत करतो.
