Ajit Pawar Plane Crash : बारामती येथे झालेल्या भीषण विमान अपघातात उपमुख्यमंत्री अजित पवार यांच्यासह ५ जणांचा मृत्यू झाला. या दुर्घटनेनंतर ज्या विमानाने प्रवास केला जात होता, त्या विमानाची सुरक्षा आणि तांत्रिक स्थितीबाबत मोठे प्रश्न उपस्थित केले जात होते.
हे विमान ‘व्हीएसआर व्हेंचर्स प्रायव्हेट लिमिटेड’ या कंपनीमार्फत चालवले जात होते, ज्याची नोंदणी ‘VT-SSK’ या नावाने झाली होती. या कंपनीच्या संचालकांनी आता विमानाची स्थिती आणि वैमानिकांच्या अनुभवाबाबत सविस्तर खुलासा केला आहे.
कसे होते अपघातग्रस्त विमान?
ज्या विमानाचा अपघात झाला ते ‘बॉम्बार्डियर लिअरजेट 45’ (Learjet 45) या प्रकारातील होते. हे विमान विशेषतः कॉर्पोरेट क्षेत्रातील दिग्गज, राजकारणी आणि अभिनेत्यांच्या पसंतीचे मानले जाते. दोन इंजिन असलेले हे छोटेखानी विमान अत्यंत वेगवान प्रवासासाठी ओळखले जाते.
कमी वेळेत गंतव्यस्थानी पोहोचण्याची क्षमता असल्यामुळे व्हीआयपी प्रवासासाठी या विमानाला नेहमीच पसंती दिली जाते. विशेषतः बारामतीसारख्या प्रादेशिक विमानतळांवर या विमानाचे उड्डाण सहज शक्य होते.
विमान कंपनीने काय दावा केला?
व्हीएसआर व्हेंचर्सचे संचालक विजय कुमार सिंह यांनी दिलेल्या माहितीनुसार, अपघातग्रस्त विमान तांत्रिकदृष्ट्या पूर्णपणे सुस्थितीत होते. विमानाची देखभाल वेळोवेळी केली जात होती आणि उड्डाणापूर्वी त्यात कोणताही दोष आढळला नव्हता. प्राथमिक माहितीनुसार, वैमानिकाने प्रथम रनवे 29 वर विमान उतरवण्याचा प्रयत्न केला, पण तिथे काही अडचण आल्याने त्यांनी रनवे 11 वर लँडिंगचा प्रयत्न केला आणि त्याच वेळी हा दुर्दैवी अपघात घडला. कदाचित कमी दृश्यमानता (Low Visibility) आणि रनवे स्पष्ट न दिसणे हे या अपघाताचे प्राथमिक कारण असू शकते.
वैमानिकांचा दांडगा अनुभव
विमानाचे नियंत्रण अत्यंत अनुभवी हातांमध्ये होते, असे कंपनीने स्पष्ट केले आहे.
- कॅप्टन सुमित कपूर: यांना 16 हजार तासांहून अधिक उड्डाणाचा प्रदीर्घ अनुभव होता. त्यांनी यापूर्वी सहारा एअरलाइन आणि जेट एअरवेजसारख्या नामांकित कंपन्यांमध्ये काम केले होते.
- को-पायलट: त्यांनाही सुमारे 1500 तासांचा अनुभव होता. संचालक विजय कुमार सिंह यांनी भावूक होत सांगितले की, कॅप्टन कपूर हे त्यांच्या भावासारखे होते आणि को-पायलट शांभवी पाठक या त्यांच्या मुलीसारख्या होत्या. दोघेही अत्यंत कार्यक्षम वैमानिक होते.
पुढील तपास आणि ब्लॅक बॉक्स
विमान पूर्णपणे सुरक्षित असतानाही हा अपघात का झाला, याचे गूढ आता डीजीसीए (DGCA) च्या चौकशीतून उलगडणार आहे. विमानाचा ‘ब्लॅक बॉक्स’ आणि तांत्रिक तपासणी झाल्यानंतरच लँडिंगच्या वेळी नक्की काय घडले, हे स्पष्ट होईल. 2023 मध्येही याच कंपनीच्या एका विमानाला मुंबईत अपघात झाला होता, मात्र ती परिस्थिती पूर्णपणे वेगळी होती, असेही कंपनीने स्पष्ट केले आहे.
