Sunetra Pawar : २८ जानेवारी २०२६ रोजी झालेल्या विमान अपघातात उपमुख्यमंत्री अजित पवार यांचे अकाली निधन झाले आणि महाराष्ट्राच्या राजकारणात एक मोठी पोकळी निर्माण झाली. पवार कुटुंबासह संपूर्ण राज्यासाठी हा मोठा धक्का आहे.
विशेषतः बारामती आणि राष्ट्रवादी काँग्रेस (अजित पवार) पक्षासमोर आता नेतृत्वाचा मोठा पेच उभा ठाकला आहे. या संकटकाळातून पक्षाला सावरण्यासाठी अजितदादांचे उत्तराधिकारी म्हणून त्यांच्या पत्नी, खासदार सुनेत्रा पवार यांच्या नावाची जोरदार चर्चा सुरू झाली आहे.
मुख्यमंत्र्यांशी प्रदीर्घ चर्चा आणि पक्षाची भूमिका
याच पार्श्वभूमीवर राष्ट्रवादी काँग्रेसच्या ज्येष्ठ नेत्यांनी मुख्यमंत्री देवेंद्र फडणवीस यांची भेट घेतली. या भेटीनंतर प्रसारमाध्यमांशी बोलताना प्रफुल पटेल यांनी स्पष्ट केले की, “अजितदादांवर असलेली जबाबदारी आता कोणाकडे द्यायची, याबाबत आम्हाला तातडीने निर्णय घ्यावा लागणार आहे. आम्ही मुख्यमंत्र्यांशी या विषयावर प्राथमिक चर्चा केली असून, लवकरच आमदारांची बैठक घेऊन अंतिम निर्णय जाहीर केला जाईल.”
पक्षातर्फे सुनेत्रा पवार यांना विधिमंडळ पक्षनेतेपद आणि राज्याचे उपमुख्यमंत्रिपद दिले जाण्याची शक्यता वर्तवली जात आहे.
कोण आहेत सुनेत्रा पवार?
सुनेत्रा पवार यांचा जन्म १८ ऑक्टोबर १९६३ रोजी धाराशिव (उस्मानाबाद) जिल्ह्यात झाला. त्यांचे माहेरचे घराणे राजकीयदृष्ट्या अत्यंत प्रभावशाली आहे. त्या माजी मंत्री पद्मसिंह पाटील यांच्या भगिनी आहेत. १९८० मध्ये त्यांचा विवाह अजित पवार यांच्याशी झाला. लग्नानंतर अनेक वर्षे त्या सक्रिय राजकारणापासून दूर राहून केवळ समाजकारण आणि कुटुंबाची जबाबदारी सांभाळत होत्या.
समाजकारणातील योगदान:
१. पर्यावरण संरक्षण: त्यांनी बारामतीत ‘एन्व्हायर्नमेंटल फोरम ऑफ इंडिया’ ही संस्था स्थापन करून पर्यावरण संवर्धनासाठी मोठे काम केले आहे.
२. महिला सक्षमीकरण: बारामती हाय-टेक टेक्सटाईल पार्कच्या माध्यमातून त्यांनी हजारो महिलांना रोजगाराच्या संधी उपलब्ध करून दिल्या. २००६ पासून त्या या संस्थेच्या अध्यक्ष आहेत.
३. शिक्षण क्षेत्र: विद्या प्रतिष्ठान या नामांकित शिक्षण संस्थेच्या विश्वस्त म्हणूनही त्या कार्यरत आहेत.
२०२४ ची लोकसभा निवडणूक आणि राजकीय वळण
सुनेत्रा पवार खऱ्या अर्थाने चर्चेत आल्या त्या २०२४ च्या लोकसभा निवडणुकीत. बारामती लोकसभा मतदारसंघातून त्यांनी आपली नणंद सुप्रिया सुळे यांच्या विरोधात निवडणूक लढवली. ही निवडणूक पवार कुटुंबासाठी आणि महाराष्ट्रासाठी अत्यंत प्रतिष्ठेची ठरली होती. जरी या निवडणुकीत सुप्रिया सुळे यांनी १.५९ लाख मतांनी विजय मिळवला असला, तरी सुनेत्रा पवार यांना ५.७३ लाखांहून अधिक मते मिळाली होती. पराभवानंतरही त्या खचल्या नाहीत आणि पक्षाच्या कामात सक्रिय राहिल्या.
राज्यसभा ते उपमुख्यमंत्रिपदाचा संभाव्य प्रवास
लोकसभा निवडणुकीनंतर राष्ट्रवादी काँग्रेसने त्यांची वर्णी राज्यसभेवर लावली. जून २०२४ मध्ये त्या बिनविरोध राज्यसभेवर निवडून आल्या. आता अजितदादांच्या निधनानंतर, त्यांच्या राजकीय वारसदार म्हणून सुनेत्रा पवार यांचे नाव आघाडीवर आहे. नरहरी झिरवळ यांच्यासारख्या ज्येष्ठ नेत्यांनी उघडपणे त्यांना उपमुख्यमंत्री करण्याची मागणी केली आहे. जर त्यांचा शपथविधी झाला, तर अजितदादांचा वारसा पुढे नेण्याचे मोठे आव्हान त्यांच्यासमोर असेल.
