Dombilvli Marathi Shawrma Girl : डोंबिवलीतील एका मराठी तरुणीच्या जिद्दीला महाराष्ट्र नवनिर्माण सेनेने दिलेला पाठिंबा आणि शब्द पाळल्याचे सुखद चित्र समोर आले आहे. मनसेचे ठाणे जिल्हाध्यक्ष अविनाश जाधव यांनी डोंबिवलीत ‘शॉरमा’ विक्रीचा व्यवसाय करणाऱ्या एकता सावंत या मराठी उद्योजिकेला हक्काचा स्टॉल मिळवून देण्याचे आश्वासन दिले होते, जे त्यांनी नुकतेच पूर्ण केले आहे. ४ फेब्रुवारी रोजी स्वतः अविनाश जाधव यांच्या हस्ते या नवीन शॉरमा स्टॉलचे लोकार्पण करण्यात आले.
काही काळापूर्वी एकता सावंत या मराठी तरुणीला आपला व्यवसाय करताना विविध अडचणींचा सामना करावा लागत होता. यावेळी मनसेच्या वतीने त्यांना मदतीचा हात देण्याचे आणि स्वतःचा अधिकृत स्टॉल मिळवून देण्याचे आश्वासन देण्यात आले होते. केवळ आश्वासन न देता, प्रशासकीय आणि तांत्रिक बाबींची पूर्तता करत अविनाश जाधव यांनी एकता यांना हा व्यवसाय सुरू करण्यासाठी मोलाचे सहकार्य केले. यामुळे मराठी तरुणांनी व्यवसायात उतरावे, या मनसेच्या भूमिकेला प्रत्यक्ष कृतीची जोड मिळाल्याचे बोलले जात आहे.
राज ठाकरेंचा फोटो आणि कृतज्ञता-
आपल्या स्वप्नातील स्टॉल साकार झाल्यानंतर एकता सावंत यांनी समाज माध्यमांद्वारे मनसे अध्यक्ष राज ठाकरे आणि अविनाश जाधव यांचे मनापासून आभार मानले आहेत. त्यांनी आपल्या पोस्टमध्ये म्हटले की, “विकासाचे दुसरे नाव म्हणजे अविनाश जाधव, तुम्ही मला खूप मदत केली, त्याबद्दल धन्यवाद.” विशेष म्हणजे, एकता सावंत यांच्या विनंतीनुसार आणि आदरापोटी या शॉरमा स्टॉलवर राज ठाकरे यांचे छायाचित्र डौलाने लावण्यात आले आहे. हे छायाचित्र त्यांच्यासाठी प्रेरणेचा स्त्रोत असल्याचे त्यांनी नमूद केले.
मराठी उद्योजकतेला प्रोत्साहन-
डोंबिवलीतील ही घटना सध्या चर्चेचा विषय ठरली आहे. “मराठी माणसाने केवळ नोकरीच्या मागे न लागता व्यवसायातही आपले नशीब आजमावावे,” ही भूमिका मनसे सातत्याने मांडत असते. एकता सावंत यांच्या यशाने इतरही मराठी तरुण-तरुणींना प्रेरणा मिळणार आहे. एका मराठी उद्योजिकेच्या पाठीशी खंबीरपणे उभे राहिल्याबद्दल स्थानिक नागरिकांनीही या उपक्रमाचे कौतुक केले आहे. या स्टॉलच्या उद्घाटनामुळे एकता सावंत यांच्या व्यावसायिक प्रवासाला आता अधिकृत आणि भक्कम पाठबळ मिळाले आहे.
पालिका प्रशासनावर ‘हप्तेखोरी’चे गंभीर आरोप-
काही दिवसांपूर्वी पालिकेच्या अतिक्रमण विभागाने एकता सावंत यांच्या शॉरमा स्टॉलवर जप्तीची कारवाई केली होती. या कारवाईनंतर एकता यांनी समाजमाध्यमांवर (Instagram) एक व्हिडिओ प्रसारित करून प्रशासनाचा बुरखा फाडला होता. “माझ्याकडून दररोज ३०० रुपये हप्ता घेऊनही ही कारवाई करण्यात आली,” असा खळबळजनक आरोप त्यांनी केला होता. तसेच, परिसरात अनेक बेकायदेशीर हातगाड्या आणि फेरीवाले असताना केवळ एका मराठी तरुणीच्या व्यवसायालाच लक्ष्य केले जात असल्याचा दावा करत त्यांनी प्रशासकीय पक्षपातीपणावर बोट ठेवले होते.
https://twitter.com/avinash_mns/status/2019286311576957243?s=20
राज ठाकरेंची दखल आणि मनसेचा पुढाकार-
एकता सावंत या समाजमाध्यमांवरील लोकप्रिय चेहरा असून त्यांच्या चित्रफितींना (Reels) दशलक्षांच्या घरात पसंती मिळते. त्यांच्या या कैफियतीची दखल थेट मनसे अध्यक्ष राज ठाकरे यांनी घेतली. साहेबांच्या सूचनेनुसार ठाणे जिल्हाध्यक्ष अविनाश जाधव यांनी तात्काळ डोंबिवलीत धाव घेतली. “मराठी माणसाच्या व्यवसायावर गदा येत असेल, तर मनसे ते सहन करणार नाही,” असा इशारा देत अविनाश जाधव यांनी आक्रमक पवित्रा घेतला होता. त्यांनी केवळ एकता यांना धीर दिला नाही, तर प्रशासनाला जाब विचारत या मराठी तरुणीच्या पाठीशी खंबीरपणे उभे राहण्याचे आश्वासन दिले.
नवा स्टॉल आणि मराठी अस्मितेचा विजय-
दिलेला शब्द पाळत अविनाश जाधव यांनी एकता सावंत यांना व्यवसायासाठी सर्व सोयींनी युक्त असा नवीन स्टॉल उपलब्ध करून दिला आहे. या स्टॉलवर राज ठाकरे यांचे छायाचित्र लावण्यात आले असून, ते मराठी तरुणांच्या जिद्दीचे प्रतीक मानले जात आहे. स्वतःच्या हक्काच्या जागेत आणि सन्मानाने व्यवसाय सुरू झाल्याने एकता सावंत यांनी मनसेचे आभार मानले आहेत. या प्रकरणामुळे डोंबिवलीतील हप्तेखोर अधिकारी आणि परप्रांतीय फेरीवाल्यांना पाठीशी घालणाऱ्या यंत्रणेचे धाबे दणाणले असून, मराठी उद्योजकांना या निमित्ताने एक मोठे पाठबळ मिळाले आहे.
डोंबिवलीतील मराठी उद्योजिका एकता सावंत यांनी महापालिकेच्या कारवाईनंतर अत्यंत भावूक होत महाराष्ट्र नवनिर्माण सेनेकडे मदतीची आर्त साद घातली होती. “मी राज साहेबांना मनापासून मानत असल्याने, माझ्या व्यवसायाच्या ठिकाणी त्यांचा फोटो हवा,” ही त्यांची इच्छा अखेर पूर्ण झाली आहे. मनसेचे ठाणे जिल्हाध्यक्ष अविनाश जाधव यांनी एकता यांची ही इच्छा पूर्ण करत त्यांना सन्मानाने व्यवसाय करण्यासाठी राज ठाकरे यांच्या प्रतिमेसह नवा शॉरमा स्टॉल उपलब्ध करून दिला आहे.
एकता सावंत यांची आग्रही मागणी-
प्रशासकीय जाच आणि हप्तेखोरीला कंटाळलेल्या एकता सावंत यांनी अविनाश जाधव यांच्याशी संवाद साधताना आपली भूमिका स्पष्ट केली होती. त्या म्हणाल्या होत्या, “दादा, मला येथे केवळ एक टपरी टाकून द्या आणि त्यावर राज साहेबांचा फोटो लावण्याची परवानगी द्या. मी मनातून राज साहेबांना मतदान करते आणि त्यांनाच आपला नेता मानते. जर त्यांच्या नावाचा आणि फोटोचा आधार माझ्या गाडीवर असेल, तर मला येथून हटवण्याची हिंमत कोणाचीच होणार नाही.” एका मराठी तरुणीने आपल्या नेत्यावर दाखवलेला हा विश्वास राजकीय वर्तुळात चर्चेचा विषय ठरला होता.
राज ठाकरेंचा संदेश आणि अविनाश जाधवांची कृती-
एकता यांची ही कैफियत ऐकल्यानंतर अविनाश जाधव यांनी त्यांना मोठे आश्वासन दिले होते. “स्वतः राज साहेबांनीच तुझी दखल घेऊन मला तुला भेटण्यासाठी पाठवले आहे. तुझ्या व्यवसायातील सर्व अडचणी आपण मिळून सोडवू, तू काळजी करू नकोस,” अशा शब्दांत जाधव यांनी त्यांना दिलासा दिला होता. मनसे नेत्यांनी केवळ आश्वासन दिले नाही, तर काही दिवसांतच सर्व कायदेशीर प्रक्रिया पार पाडून एकता यांच्यासाठी हक्काचा स्टॉल उभा केला. या यशस्वी पाठपुराव्यामुळे डोंबिवलीत मराठी अस्मितेचा आणि स्वावलंबनाचा एक नवीन अध्याय सुरू झाला आहे.
