Thackeray Brothers : महाराष्ट्राच्या राजकारणात ‘ठाकरे’ या नावाला अनन्यसाधारण महत्त्व आहे. काही काळापूर्वीपर्यंत राजकारणातील संघर्षाची धार बाजूला ठेवून, कौटुंबिक सण-उत्सवांच्या निमित्ताने एकत्र येणारे शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे यांच्यातील दुरावा आता अधिकच स्पष्ट होऊ लागला आहे. मात्र, नुकत्याच पार पडलेल्या गुढीपाडव्याच्या शुभ मुहूर्तावर दोन्ही नेत्यांनी एकमेकांची भेट घेणे टाळल्याने राजकीय वर्तुळात पुन्हा एकदा तर्कवितर्कांना उधाण आले आहे. या पार्श्वभूमीवर, ठाकरे बंधूंमधील नाते केवळ ‘निवडणूक केंद्रित’ होते का, असा गंभीर प्रश्न आता उपस्थित केला जात आहे.
निवडणुकीच्या रणधुमाळीपूर्वी या दोन्ही नेत्यांच्या गाठीभेटी वाढल्या होत्या. विशेषतः सण-उत्सवांच्या काळात एकमेकांच्या निवासस्थानी जाऊन शुभेच्छा देणे, हे त्यांच्यातील स्नेहपूर्ण संबंधांचे निदर्शक मानले जात असे. मात्र, निवडणूक संपल्यानंतर मात्र या भेटीगाठी कमी होत चालायचे दिसून येत आहे. गुढीपाडव्यासारख्या अत्यंत महत्त्वाच्या मराठी सणाच्या दिवशीही दोन्ही नेत्यांनी आपापल्या राजकीय कक्षांमध्येच राहणे पसंत केले. निवडणुकीच्या तोंडावर होणारी राजकीय सोय आणि प्रत्यक्ष कौटुंबिक जिव्हाळा यांत मोठी दरी निर्माण झाली आहे.
ठाकरे बंधूंमधील राजकीय दुरावा अधिक गडद; गुढीपाडवा मेळाव्यानंतर आता सर्वांचे लक्ष रामनवमीकडे
महाराष्ट्र नवनिर्माण सेनेचे अध्यक्ष राज ठाकरे यांचा गुढीपाडवा मेळावा नुकताच मोठ्या उत्साहात पार पडला. या मेळाव्यात त्यांनी आपल्या आक्रमक शैलीत सत्ताधाऱ्यांच्या धोरणांवर कडाडून टीका केली. मात्र, या महत्त्वाच्या सोहळ्याला शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांची अनुपस्थिती प्रकर्षाने जाणवली. महापालिका निवडणुकीच्या काळात हे दोन्ही नेते वारंवार एकमेकांना भेटताना दिसत होते.परंतु, निवडणुका संपताच या भेटीगाठींचे सत्र थंडावल्याचे चित्र सध्या पाहायला मिळत आहे.
विशेष म्हणजे, मुंबई महानगरपालिकेच्या निवडणुकीपूर्वी दोन्ही नेत्यांनी एकमेकांच्या निवासस्थानी जाऊन संवाद साधला होता. मात्र,निवडणुकांचा टप्पा पार पडल्यानंतर या दोन्ही भावांमध्ये पुन्हा एकदा संवादाची दरी निर्माण झाल्याचे दिसून येत आहे. गुढीपाडव्यासारख्या महत्त्वाच्या मराठी सणालाही दोन्ही नेत्यांनी एकत्र येणे टाळल्यामुळे, ही जवळीक केवळ निवडणुकीच्या रणनीतीपुरतीच मर्यादित होती का, असा प्रश्न उपस्थित होत आहे.
आता सर्वांच्या नजरा येत्या २६ तारखेला साजऱ्या होणाऱ्या रामनवमीच्या उत्सवाकडे लागल्या आहेत. रामनवमी हा हिंदू संस्कृतीतील अत्यंत पवित्र सण असून, या शुभ मुहूर्तावर तरी ठाकरे बंधू एकत्र येऊन भेटीगाठी घेणार का, याकडे महाराष्ट्राचे लक्ष लागले आहे.
