Income Tax Raid: हैदराबादमधील बिर्याणीसाठी प्रसिद्ध असलेल्या ३ मोठ्या हॉटेल साखळींच्या कर चोरीच्या चौकशीतून आता संपूर्ण देशातील खाद्य उद्योगाला हादरवणारा ७०,००० कोटी रुपयांचा महाघोटाळा समोर येण्याची शक्यता आहे. प्राप्तिकर विभागाने केलेल्या तपासणीत रेस्टॉरंट्सच्या बिलिंग सिस्टममध्ये मोठ्या प्रमाणावर फेरफार केली जात असल्याचे धागेदोरे हाती लागले आहेत.
धाडीतून उघड झाला ‘डिजिटल’ बनाव
गेल्या वर्षी नोव्हेंबर महिन्यात हैदराबादमधील ३ नामवंत बिर्याणी ब्रँडच्या ३० ठिकाणांवर प्राप्तिकर विभागाने छापे टाकले होते. या कारवाईत जप्त केलेल्या डिजिटल नोंदी आणि यूपीआय व्यवहारांच्या तपासणीतून अधिकाऱ्यांना एका मोठ्या कटाचा सुगावा लागला. सुमारे ६० टीबी डेटाच्या विश्लेषणातून असे दिसून आले की, देशभरातील १.७ लाख रेस्टॉरंट आयडीमध्ये एका विशिष्ट बिलिंग सॉफ्टवेअरचा वापर केला जात आहे.
कसा केला जायचा घोटाळा?
तपास यंत्रणांच्या मते, या बिलिंग सॉफ्टवेअरमध्ये ‘बल्क डिलीट’ नावाचे एक खास फीचर होते. याच्या मदतीने हॉटेल मालक खालील गोष्टी करत असत:
- विक्रीच्या नोंदी पुसणे: एका क्लिकवर मागील ३० दिवसांच्या विक्रीच्या नोंदी पूर्णपणे गायब केल्या जात होत्या.
- बिल फेरफार: बिल तयार झाल्यानंतर त्यात बदल करणे किंवा काही विशिष्ट बिलांची नोंदच काढून टाकणे यामुळे एकूण उलाढाल कमी दाखवली जात असे.
- कर चोरी: विक्री कमी दाखवून कराची मोठी रक्कम वाचवली जात होती.
७०,००० कोटींचा आकडा आणि व्याप्ती
प्राथमिक अंदाजानुसार, २०१९-२० पासून आतापर्यंत सुमारे ७०,००० कोटी रुपयांची विक्री कागदोपत्री लपवण्यात आली आहे. एकट्या आंध्र प्रदेश आणि तेलंगणा राज्यातून ५,००० कोटींचा असा लपवलेला व्यवहार समोर आला आहे. हजारो पॅन कार्ड्सच्या आधारे झालेल्या व्यवहारांमध्ये प्रत्येकी १ कोटीपेक्षा जास्त रक्कम घोषित केलेली नाही.
प्राप्तिकर विभागाने अद्याप अधिकृत निवेदन प्रसिद्ध केलेले नाही, परंतु अधिकारी सध्या डिलीट केलेला डेटा पुन्हा मिळवण्याचे काम करत आहेत. हा तपास पूर्ण झाल्यावर संबंधित हॉटेल मालकांवर मोठी दंडात्मक कारवाई आणि फौजदारी खटले भरले जाण्याची शक्यता आहे.
हे देखील वाचा – Aadhaar App : आधार कार्डवरील पत्ता बदलणे आता अधिक सोपे! घराबाहेर न पडता मोबाईलवरून करा अपडेट; पाहा नवीन प्रोसेस
