Actor Vijay TVK Promises: आंतरराष्ट्रीय महिला दिनाचे औचित्य साधून तमिळगा वेत्री कळघम (TVK) पक्षाचे सर्वेसर्वा आणि लोकप्रिय अभिनेता विजय याने तमिळनाडूच्या राजकारणात आपली मोठी खेळी खेळली आहे. चेन्नई येथे आयोजित एका कार्यक्रमात त्याने महिला मतदारांना आकर्षित करण्यासाठी अनेक कल्याणकारी योजनांची घोषणा केली. द्रविड राजकारणातील प्रस्थापित पक्षांना आव्हान देत विजयने आपल्या ‘कल्याणकारी आराखड्याचे’ सादरीकरण केले.
महिलांसाठी आर्थिक मदतीचा पाऊस
विजयने जाहीर केलेल्या घोषणांमध्ये सर्वात महत्त्वाची म्हणजे कुटुंबातील महिला प्रमुखाला दरमहा 2,500 रुपये रोख मदत दिली जाईल. सध्याच्या सत्ताधारी डीएमके सरकारच्या 1,000 रुपयांच्या योजनेला शह देण्यासाठी विजयने ही मोठी रक्कम जाहीर केली आहे. ही मदत 60 वर्षांखालील अशा महिलांना मिळेल ज्यांचे कुटुंबीय सरकारी नोकरीत नाहीत.
घरगुती बजेटला दिलासा
वाढत्या महागाईचा विचार करून विजयने दरवर्षी 6 गॅस सिलिंडर मोफत देण्याचे आश्वासन दिले आहे. तसेच महिलांसाठी मोफत बस प्रवासाची सुविधाही त्याच्या जाहीरनाम्यात समाविष्ट आहे. याशिवाय ‘अण्णन सीर’ योजनेअंतर्गत मुलींच्या लग्नासाठी 8 ग्रॅम सोने आणि सिल्क साडी देण्याचेही त्याने जाहीर केले.
शिक्षण आणि सुरक्षा यावर भर
- शिक्षण: शाळा गळती रोखण्यासाठी 9 वी ते 12 वी मधील विद्यार्थ्यांना वार्षिक 15,000 रुपयांची मदत देणारी ‘कामरानर शिक्षण विमा योजना’ राबवली जाईल.
- नवजात बालके: ‘ताई मामन’ योजनेअंतर्गत जन्माला येणाऱ्या प्रत्येक मुलीला सोन्याची अंगठी आणि बेबी केअर किट दिले जाईल.
- सुरक्षा: महिलांच्या सुरक्षेसाठी 500 विशेष पथके तयार केली जातील, जी बॉडी कॅमेऱ्यांनी सज्ज असतील. तसेच सार्वजनिक वाहतुकीत ‘पॅनिक बटण’ आणि सीसीटीव्हीचे जाळे विस्तारले जाईल. महिलांवरील गुन्ह्यांसाठी ‘अंजली अम्माल’ जलदगती न्यायालये स्थापन केली जातील.
भ्रष्टाचारावर प्रहार
इतक्या मोठ्या योजनांसाठी निधी कोठून येणार, या प्रश्नावर विजयने थेट भ्रष्टाचारावर निशाणा साधला. त्याने सत्ताधारी सरकारवर गंभीर आरोप करत म्हटले की, जर भ्रष्टाचार थांबवला तर जनतेच्या पैशातून या सर्व योजना सहज राबवता येतील.
वैयक्तिक आयुष्याबद्दल सुरू असलेल्या चर्चांवर भाष्य करताना विजय म्हणाला की, “माझ्या समर्थकांनी अशा अफवांकडे लक्ष देऊ नये. मी परिस्थिती हाताळण्यास समर्थ आहे, आपण सर्वांनी मिळून जनतेच्या प्रश्नांवर लक्ष केंद्रित करूया.”
