Air India Crash Survivor : 12 जून रोजी अहमदाबादमध्ये झालेल्या भीषण एअर इंडिया विमान दुर्घटनेने (Air India Crash) देशाला हादरवून सोडले होते. या अपघातात 241 प्रवाशांचे दुर्दैवी निधन झाले. या भयंकर दुर्घटनेतून एकमेव बचावलेले ब्रिटिश नागरिक विश्वासकुमार रमेश यांनी आपले मनोगत व्यक्त केले आहे.
BBC ला दिलेल्या मुलाखतीत रमेश यांनी स्वतःला ‘जगातील सर्वात नशीबवान व्यक्ती’ म्हटले असले तरी, या घटनेनंतर त्यांना होणारा शारीरिक आणि मानसिक त्रास (PTSD) हा जीवघेणा ठरत असल्याचे सांगितले.
लंडनला जाणाऱ्या AI 171 विमानाचा अपघात अहमदाबादमधील एका वैद्यकीय वसतिगृहाजवळ झाला होता. या दुर्घटनेनंतर विमानाचे अवशेष सोडून चालत जाणारे रमेश यांचे दृश्य अनेकांनी पाहिले होते. रमेश यांनी सांगितले की, त्यांच्यापासून काहीच आसनांच्या अंतरावर बसलेल्या त्यांचे लहान भाऊ अजय यांचा या अपघातात मृत्यू झाला.
“मी एकटा वाचलोय, पण अजूनही माझा यावर विश्वास बसत नाही. हा खरंच चमत्कार आहे,” असे ते म्हणाले.
भावाचे दुःख आणि उपचारांचा अभाव
रमेश यांच्यासाठी त्यांचे भाऊ अजय हे त्यांचा आधारस्तंभ होते. भावाच्या जाण्याने ते पूर्णपणे कोसळले आहेत. “मी माझा आधार गमावला आहे. आता मी पूर्णपणे एकटा पडलो आहे. मी फक्त माझ्या खोलीत बसतो, माझी पत्नी किंवा मुलाशीही बोलत नाही. मला फक्त एकटे राहायला आवडते,” असे त्यांनी सांगितले.
रमेश यांना PTSD चे निदान झाले आहे, पण भारतात रुग्णालयात उपचार घेतल्यानंतर ब्रिटनमधील लेस्टर येथील घरी परतल्यावर त्यांना आवश्यक मानसिक उपचार मिळालेले नाहीत. अपघातानंतर गेले चार महिने त्यांची आई रोज दरवाजाबाहेर बसून असते आणि कोणाशीही बोलत नाही.
ते म्हणाले, “माझ्या आणि माझ्या कुटुंबासाठी प्रत्येक दिवस खूप वेदनादायक आहे. मी रात्रभर विचार करत राहतो आणि मानसिक त्रास सहन करतोय.”
शारीरिक जखमा आणि व्यवसाय
अपघातात विमानाचा भाग उघडून पडल्यामुळे ते आपल्या 11A क्रमांकाच्या सीटमधून बाहेर पडू शकले होते. या घटनेत झालेल्या गंभीर दुखापतींमुळे त्यांच्या पाय, खांदा, गुडघा आणि पाठीवर अजूनही वेदना आहेत. त्यामुळे ते काम करू शकत नाहीत किंवा गाडी चालवू शकत नाहीत. दीव येथे ते भावासोबत चालवत असलेला मासेमारीचा कौटुंबिक व्यवसायही या अपघातानंतर पूर्णपणे बंद पडला आहे.
एअर इंडियाच्या भूमिकेवर प्रश्नचिन्ह
रमेश यांना मदत करणारे कम्युनिटी लीडर संजीव पटेल आणि प्रवक्ते रॅड सिगर यांनी टाटा समूहाच्या मालकीच्या एअर इंडियाकडून मिळत असलेल्या मदतीवर प्रश्नचिन्ह उपस्थित केले आहे. सिगर यांनी आरोप केला आहे की, “भेटीसाठी केलेल्या आमच्या विनंत्यांकडे एअर इंडियाने दुर्लक्ष केले आहे.” त्यांनी म्हटले की, “ज्यांनी या वेदना कमी करण्यासाठी काम केले पाहिजे, त्या एअर इंडियाच्या अधिकाऱ्यांनी आज येथे बसले पाहिजे.”
एअर इंडियाने मात्र या आरोपांवर उत्तर देताना म्हटले आहे की, त्यांच्या वरिष्ठ अधिकाऱ्यांनी कुटुंबीयांची भेट घेऊन शोक व्यक्त केला आहे आणि रमेश यांच्या प्रतिनिधींना बैठकीसाठी ऑफर दिली आहे.
एअर इंडियाने रमेश यांना अंतरिम भरपाई म्हणून £21,500 (सुमारे 25.09 लाख रुपये) देऊ केली आहे. ही रक्कम रमेश यांनी स्वीकारली असली तरी, त्यांच्या सल्लागारांच्या मते त्यांच्या तातडीच्या गरजा पूर्ण करण्यासाठी ती अपुरी आहे.
हे देखील वाचा – Prakash Surve: ‘मराठी माझी आई, उत्तर भारत मावशी..आई मेली तरी चालेल, पण…’; शिंदे गटाच्या आमदाराच्या विधानामुळे नवा वाद
