Andhra Pradesh Firecracker Blast: आंध्र प्रदेशातील काकीनाडा जिल्ह्यात एका फटाका निर्मिती केंद्रात झालेल्या प्रचंड स्फोटामुळे मोठी खळबळ उडाली आहे. या भीषण दुर्घटनेत प्राथमिक माहितीनुसार 10 पेक्षा जास्त लोकांचा मृत्यू झाला असून अनेक जण गंभीर जखमी झाले आहेत. काकीनाडा जिल्ह्यातील वेटलापालेम गावातील ‘सूर्या श्री फायर वर्क्स’ या कारखान्यात ही घटना घडली.
5 किलोमीटरपर्यंत ऐकू आला आवाज
मिळालेल्या माहितीनुसार, हा स्फोट इतका शक्तिशाली होता की त्याचा आवाज सुमारे 5 किलोमीटर अंतरापर्यंत ऐकू आला. स्फोटानंतर कारखान्यात मोठी आग लागली आणि आकाशात धुराचे लोट पसरले, ज्यामुळे आजूबाजूच्या गावातील नागरिकांमध्ये भीतीचे वातावरण निर्माण झाले. स्फोटाच्या धक्क्याने मृतदेह शेजारील शेतात फेकले गेल्याचे प्रत्यक्षदर्शींनी सांगितले. इतकेच नाही तर शेजारील गावातील एका खाजगी शाळेच्या इमारतीच्या स्लॅबलाही या धक्क्यामुळे तडे गेले आहेत.
बचावकार्य सुरू
घटनेची माहिती मिळताच अग्निशमन दलाच्या गाड्या घटनास्थळी दाखल झाल्या आणि त्यांनी आगीवर नियंत्रण मिळवण्याचे प्रयत्न सुरू केले. या स्फोटात किमान 8 जण गंभीर भाजले असून त्यांना रुग्णवाहिकेने जवळच्या रुग्णालयात दाखल करण्यात आले आहे. मृतांची अधिकृत ओळख पटवण्याचे काम अद्याप सुरू आहे. कारखान्यात घटनेच्या वेळी नेमके किती कामगार उपस्थित होते, याची माहिती घेतली जात असून ढिगाऱ्याखाली आणखी काही लोक दबले असण्याची भीती व्यक्त होत आहे.
तपासाचे आदेश
हा स्फोट नेमका कशामुळे झाला याचे कारण अद्याप अस्पष्ट आहे. या फटाका निर्मिती केंद्रामध्ये सुरक्षिततेच्या नियमांचे पालन केले जात होते का, याची सखोल चौकशी करण्याचे आदेश अधिकाऱ्यांनी दिले आहेत. स्थानिक प्रशासन आणि आपत्कालीन पथके घटनास्थळी बचाव कार्यात गुंतलेली असून मृतांचा आकडा वाढण्याची शक्यता वर्तवण्यात येत आहे.
