Sheikh Hasina Extradition: बांगलादेशातील सार्वत्रिक निवडणुकीत एकतर्फी विजय मिळवल्यानंतर आता बांगलादेश नॅशनलिस्ट पार्टीने (BNP) आक्रमक पवित्रा घेतला आहे. भारतात आश्रयाला असलेल्या माजी पंतप्रधान शेख हसीना यांना पुन्हा बांगलादेशात पाठवावे, अशी मागणी पक्षाने अधिकृतपणे केली आहे. त्यांच्यावर बांगलादेशात खटला चालवून त्यांना शिक्षा व्हावी, असा ‘बीएनपी’चा निर्धार आहे.
कायदेशीर प्रक्रियेद्वारे मागणी
बीएनपीच्या स्थायी समितीचे सदस्य सालाहुद्दीन अहमद यांनी सांगितले की, त्यांचा पक्ष हसीना यांच्या प्रत्यार्पणासाठी भारत सरकारकडे औपचारिक विनंती करणार आहे. “आमच्या परराष्ट्र मंत्रालयाने यापूर्वीच या विषयाचा पाठपुरावा सुरू केला असून, आम्ही त्याला पूर्ण पाठिंबा देतो. भारताने त्यांना कायदेशीर प्रक्रियेनुसार परत पाठवावे, जेणेकरून त्या बांगलादेशात न्यायाचा सामना करू शकतील,” असे अहमद यांनी स्पष्ट केले.
भारतासोबतच्या संबंधांवर भाष्य
भारतासोबतच्या संबंधांबाबत बोलताना सालाहुद्दीन अहमद म्हणाले की, आम्हाला भारत आणि सर्व शेजारील देशांसोबत सामान्य आणि मैत्रीपूर्ण संबंध हवे आहेत. मात्र, हे संबंध परस्पर आदर आणि समानतेच्या तत्त्वावर आधारित असायला हवेत. दोन देशांच्या परराष्ट्र मंत्रालयामधील हा एक महत्त्वाचा मुद्दा असल्याचेही त्यांनी नमूद केले.
हसीना सध्या कुठे आहेत?
ऑगस्ट 2024 मध्ये झालेल्या जनआंदोलनानंतर शेख हसीना यांनी सत्ता सोडून भारतात आश्रय घेतला होता. तेव्हापासून त्या नवी दिल्लीत वास्तव्यास आहेत. नोव्हेंबर 2025 मध्ये बांगलादेशातील एका विशेष लवादाने मानवी हक्कांच्या उल्लंघनाप्रकरणी त्यांच्या अनुपस्थितीत त्यांना फाशीची शिक्षा सुनावली आहे. मधल्या काळात त्यांनी दिल्लीतून मोहम्मद युनूस यांच्या नेतृत्वाखालील अंतरिम सरकारविरुद्ध बंड करण्याचे आवाहन केल्याने ढाकामध्ये तीव्र प्रतिक्रिया उमटल्या होत्या.
भारत सरकारची भूमिका
भारताच्या परराष्ट्र मंत्रालयाने यापूर्वीच स्पष्ट केले आहे की, त्यांना बांगलादेशाकडून प्रत्यार्पणाची विनंती प्राप्त झाली आहे. सध्या या विनंतीवर अंतर्गत कायदेशीर आणि न्यायालयीन प्रक्रियांच्या माध्यमातून विचार केला जात आहे. “आम्ही बांगलादेशातील लोकशाही, शांतता आणि स्थिरतेसाठी कटिबद्ध आहोत आणि तिथल्या सर्व भागधारकांशी सकारात्मक चर्चा करत राहू,” असे परराष्ट्र मंत्रालयाचे प्रवक्ते रणधीर जयस्वाल यांनी नोव्हेंबरमध्ये सांगितले होते.
