X Grok AI Controversy : सोशल मीडिया प्लॅटफॉर्म X (ट्विटर) वरील आर्टिफिशिअल इंटेलिजन्स चॅटबॉट ‘Grok’ च्या गैरवापरावरून केंद्र सरकारने कडक पवित्रा घेतला आहे. या चॅटबॉटचा वापर करून महिलांचे अश्लील आणि आक्षेपार्ह फोटो तयार केले जात असल्याच्या तक्रारीनंतर, इलेक्ट्रॉनिक्स आणि माहिती तंत्रज्ञान मंत्रालयाने X ला 72 तासांचा अल्टीमेटम दिला आहे.
या कालावधीत अश्लील आशय हटवून सविस्तर अहवाल सादर करण्याचे निर्देश देण्यात आले आहेत.
नेमके प्रकरण काय आहे?
शिवसेना (UBT) खासदार प्रियांका चतुर्वेदी यांनी आयटी मंत्री अश्विनी वैष्णव यांना पत्र लिहून या गंभीर समस्येकडे लक्ष वेधले होते. Grok AI द्वारे महिलांचे मूळ फोटो वापरून त्यांचे अश्लील आणि विवस्त्र फोटो सहजपणे तयार केले जात असल्याचे त्यांनी निदर्शनास आणून दिले होते. महिलांच्या प्रतिष्ठेला धक्का लावणाऱ्या या प्रकारामुळे डिजिटल प्लॅटफॉर्मवर महिलांच्या सुरक्षिततेचा प्रश्न निर्माण झाला आहे.
मंत्रालयाची नोटीस
केंद्र सरकारने पाठवलेल्या नोटीसमध्ये असे म्हटले आहे की, X प्लॅटफॉर्म माहिती तंत्रज्ञान कायदा 2000 आणि IT नियम 2021 अंतर्गत आपल्या जबाबदाऱ्या पार पाडण्यात अपयशी ठरले आहे. Grok AI च्या तांत्रिक आणि प्रशासकीय चौकटीचा आढावा घेण्याचे आदेश देण्यात आले आहेत, जेणेकरून बेकायदेशीर आशय तयार होण्यास प्रतिबंध बसेल. जो आशय आधीच प्रसारित झाला आहे, तो पुराव्यांशी छेडछाड न करता तात्काळ हटवण्यास सांगितले आहे.
कायदेशीर कारवाईचा इशारा
जर X प्लॅटफॉर्मने या आदेशाचे पालन केले नाही, तर त्यांना IT कायद्याच्या कलम 79 अंतर्गत मिळणारे संरक्षण गमवावे लागेल. तसेच, भारतीय न्याय संहिता (BNS), पोक्सो (POCSO) कायदा आणि महिलांच्या अश्लील प्रदर्शनास प्रतिबंध करणाऱ्या कायद्यांतर्गत कठोर दंडात्मक कारवाई केली जाईल, असा इशारा सरकारने दिला आहे. गैरवापर करणाऱ्या युजर्सची खाती कायमची बंद करण्याचे निर्देशही देण्यात आले आहेत.
प्रियांका चतुर्वेदी यांनी केंद्र सरकारच्या या जलद कारवाईबद्दल आयटी मंत्री अश्विनी वैष्णव यांचे आभार मानले आहेत. तंत्रज्ञानाचा वापर महिलांचा आवाज दाबण्यासाठी किंवा त्यांच्या प्रतिष्ठेला धक्का लावण्यासाठी केला जाणे स्वीकारार्ह नाही, असेही त्यांनी नमूद केले.
हे देखील वाचा – Ajit Pawar : “तुमच्या तोंडात साखर पडो!” बॅनरवर शरद पवारांचा फोटो पाहून अजित पवारांचे सूचक विधान; पुण्यात दोन्ही राष्ट्रवादी एकत्र
