CM Vijay Thalapathy : तमिळनाडूच्या मुख्यमंत्री पदाची सूत्रे हाती घेताच चित्रपट अभिनेते ते राजकारणी असा प्रवास केलेले थलपती विजय यांनी जनतेला दिलेली आश्वासने पूर्ण करण्यास धडाक्यात सुरुवात केली आहे. राज्यातील सामाजिक स्वास्थ्य जपण्यासाठी त्यांनी एक अत्यंत धाडसी पाऊल उचलले असून, धार्मिक स्थळे, शैक्षणिक संस्था आणि बस स्थानकांपासून ५०० मीटरच्या परिघात असलेली ७१७ ‘टास्मॅक’ (TASMAC) सरकारी मद्यविक्री दुकाने त्वरित बंद करण्याचे आदेश दिले आहेत. या निर्णयाची अंमलबजावणी करण्यासाठी प्रशासनाला दोन आठवड्यांची मुदत देण्यात आली आहे.
लोकभावनेचा आदर आणि महसुलावर जनहिताची मात
तमिळनाडूमध्ये गेल्या अनेक वर्षांपासून शाळा, महाविद्यालये आणि प्रार्थनास्थळांजवळील दारूची दुकाने हटवण्यासाठी जनआंदोलने होत होती. राज्यात सुमारे ५,००० सरकारी मद्यविक्री केंद्रे असून त्यातून सरकारला वार्षिक सुमारे ४० हजार कोटी रुपयांचा भरघोस महसूल मिळतो. याच महसुली उत्पन्नामुळे यापूर्वीच्या डीएमके (DMK) किंवा एआयएडीएमके (AIADMK) सारख्या पक्षांनी निवडणूक जाहीरनाम्यात आश्वासने देऊनही ठोस कार्यवाही करण्याचे टाळले होते. मात्र, मुख्यमंत्री विजय यांनी महसुलापेक्षा जनहिताला प्राधान्य देत या ७१७ दुकानांवर बंदी घातली आहे.
ऐतिहासिक पार्श्वभूमी आणि आव्हाने
यापूर्वी २०१६ मध्ये दिवंगत मुख्यमंत्री जयललिता यांनी टप्प्याटप्प्याने मद्यबंदीचे प्रयत्न केले होते. तसेच २०२३ मध्ये एम. के. स्टॅलिन सरकारने बनावट दारूमुळे झालेल्या मृत्यूनंतर ५०० दुकाने बंद केली होती, ज्यात चेन्नईतील ६१, कांचीपुरममधील ३१ आणि मदुराईतील २१ दुकानांचा समावेश होता. पूर्णपणे मद्यबंदी लागू केल्यास अवैध दारूचा शिरकाव होऊन लोकांच्या जिवाला धोका निर्माण होऊ शकतो, असा युक्तिवाद सरकारांकडून केला जातो. स्टॅलिन यांच्या कार्यकाळातही विषारी दारूमुळे सुमारे ६० जणांना प्राण गमवावे लागले होते. या पार्श्वभूमीवर विजय यांचे हे पाऊल अधिक महत्त्वाचे मानले जात आहे.
नव्या सरकारची धडाकेबाज सुरुवात
१० मे रोजी काँग्रेस नेते राहुल गांधी यांच्या उपस्थितीत मुख्यमंत्री पदाची शपथ घेतल्यापासून थलपती विजय यांनी राज्याच्या राजकारणात बदलाचे वारे वाहू दिले आहेत. राज्यपाल विश्वनाथ आर्लेकर यांनी त्यांना गोपनीयतेची शपथ दिली. पदभार स्वीकारताच त्यांनी केवळ मद्यविक्रीवर निर्बंध आणले नाहीत, तर सर्वसामान्यांसाठी २०० युनिट मोफत वीज आणि महिलांसाठी मोफत बस प्रवासाची घोषणा करून दिलासा दिला आहे.
