Colombia military plane crash : दक्षिण अमेरिकेतील कोलंबियामधून एक अतिशय धक्कादायक बातमी समोर आली आहे. देशाच्या दक्षिणेकडील ॲमेझॉन भागात सोमवारी कोलंबियन हवाई दलाचे एक मोठे लष्करी विमान कोसळले. या भीषण अपघातात किमान 66 लोकांचा मृत्यू झाला असून मृतांचा आकडा वाढण्याची भीती व्यक्त केली जात आहे.
Colombia Plane Crash: उड्डाणानंतर काही मिनिटांतच घातपात
मिळालेल्या माहितीनुसार, लॉकहीड मार्टिन हरक्यूलिस C-130 या विमानाने पेरूच्या सीमेजवळील पुएर्तो लेगुझामो येथून उड्डाण केले होते. या विमानात 114 प्रवासी आणि 11 कर्मचारी असे एकूण 125 जण होते, जे प्रामुख्याने लष्करी जवान होते. मात्र, टेकऑफनंतर अवघ्या काही मिनिटांतच हे विमान खाली कोसळले. या घटनेचे काही व्हिडिओ समोर आले असून, दाट जंगलातून काळा धूर निघताना दिसत आहे.
Colombia Plane Crash: बचावकार्य आणि तपास सुरू
अपघाताची माहिती मिळताच आपत्कालीन पथके घटनास्थळी रवाना झाली आहेत. हा भाग अतिशय दुर्गम असल्याने बचावकार्यात अडचणी येत आहेत. संरक्षण मंत्री पेड्रो सांचेझ यांनी या घटनेला दुजोरा दिला असून अपघाताचे नेमके कारण अद्याप स्पष्ट झालेले नाही. मृतांची ओळख पटवण्याचे काम सध्या युद्धपातळीवर सुरू आहे.
जुन्या विमानांच्या सुरक्षेवर प्रश्नचिन्ह
हरक्यूलिस C-130 हे विमान 1950 च्या दशकापासून जगभरातील लष्करी दलांमध्ये वापरले जात आहे. कोलंबियामध्येही 1960 पासून या विमानांचा वापर सुरू आहे. मात्र, ही विमाने आता जुनी झाली असून त्यांच्या देखभालीवर अनेकदा प्रश्न उपस्थित केले गेले आहेत. काही आठवड्यांपूर्वी शेजारील बोलिव्हियामध्येही अशाच प्रकारचे विमान कोसळून 20 हून अधिक जणांचा मृत्यू झाला होता, ज्यामुळे जुन्या विमानांच्या सुरक्षेबाबतची चिंता अधिक वाढली आहे.
