Donald Trump signature on US paper Currency : अमेरिकन चलनी नोटांच्या इतिहासात एक अत्यंत मोठा आणि ऐतिहासिक बदल होणार आहे. अमेरिकेच्या स्वातंत्र्याला २५० वर्षे पूर्ण होत असल्याच्या निमित्ताने, आता अमेरिकन डॉलरवर राष्ट्राध्यक्ष डोनाल्ड ट्रम्प यांची स्वाक्षरी झळकणार आहे. अमेरिकेच्या ट्रेझरी विभागाने यासंदर्भातील अधिकृत घोषणा केली. कोणत्याही विद्यमान राष्ट्राध्यक्षाची स्वाक्षरी चलनी नोटांवर असण्याची ही पहिलीच वेळ ठरणार आहे.
१६५ वर्षांची परंपरा खंडित
या निर्णयामुळे अमेरिकेतील १८६१ पासून चालत आलेली तब्बल १६५ वर्षांची जुनी परंपरा आता मोडली जाणार आहे. १८६१ मध्ये फेडरल चलन प्रणाली सुरू झाल्यापासून अमेरिकेच्या ट्रेझररची स्वाक्षरी नोटांवर असणे अनिवार्य होते. मात्र, आता नवीन प्रणालीमध्ये ट्रेझररची स्वाक्षरी काढून टाकण्यात येणार आहे. हा बदल अमेरिकन चलनाच्या इतिहासातील एक मोठा वळणबिंदू मानला जात आहे.
जून महिन्यापासून छपाई सुरू
ट्रेझरी विभागाने दिलेल्या माहितीनुसार, ट्रम्प यांची स्वाक्षरी असलेल्या पहिल्या १०० डॉलरच्या नोटांची छपाई जून २०२६ मध्ये सुरू होईल. या नोटांवर ट्रेझरी सचिव स्कॉट बेसेन्ट यांचीही स्वाक्षरी असेल. यानंतर इतर सर्व मूल्यांच्या नोटांवरही ट्रम्प यांची स्वाक्षरी टप्प्याटप्प्याने आणली जाईल. स्कॉट बेसेन्ट यांनी या निर्णयाचे स्वागत करताना म्हटले आहे की, देशाच्या प्रगतीचा आणि ऐतिहासिक कामगिरीचा गौरव करण्यासाठी हा एक उत्तम मार्ग आहे.
स्वातंत्र्य दिनाचे विशेष औचित्य
४ जुलै रोजी साजऱ्या होणाऱ्या अमेरिकन स्वातंत्र्याच्या २५० व्या वर्धापनदिनानिमित्त (Semiquincentennial) हा निर्णय घेण्यात आला आहे. सध्या बाजारात असलेल्या नोटांवर माजी ट्रेझरी सचिव जेनेट येलेन आणि ट्रेझरर लिन मालेर्बा यांच्या स्वाक्षऱ्या आहेत. मात्र, आता नवीन नोटांच्या रूपाने ट्रम्प यांचे नाव थेट अमेरिकन डॉलरशी जोडले जाणार आहे.
याच सोहळ्याचा भाग म्हणून ट्रम्प यांची प्रतिमा असलेले २४ कॅरेट सोन्याचे खास नाणे देखील बाजारात आणले जाणार आहे. फेडरल आर्ट्स कमिशनने याआधीच या नाण्याच्या डिझाइनला मंजुरी दिली आहे. अमेरिकेच्या गौरवशाली इतिहासात ट्रम्प यांचे योगदान अधोरेखित करण्यासाठी हे पाऊल उचलले जात असल्याचे प्रशासनाकडून सांगण्यात आले आहे.
