SIR Election Documents: निवडणूक आयोगाकडून 12 राज्यांत SIR सुरू; मतदार यादीत नाव नोंदवण्यासाठी ‘ही’ कागदपत्रे तयार ठेवा

SIR Election Documents: मुख्य निवडणूक आयुक्त ज्ञानेश कुमार यांनी 12 राज्ये आणि केंद्रशासित प्रदेशांमध्ये मतदार याद्यांच्या अखिल भारतीय विशेष सखोल पुनरीक्षणाच्या (SIR) दुसऱ्या टप्प्याची घोषणा केली आहे. मतदार यादीची अचूकता सुनिश्चित करणे हा या विशेष मोहिमेचा उद्देश आहे.

या पुनरीक्षण कार्यक्रमात अंदमान आणि निकोबार बेटे, लक्षद्वीप, छत्तीसगड, गोवा, गुजरात, केरळ, मध्य प्रदेश, पुद्दुचेरी, राजस्थान, तामिळनाडू, उत्तर प्रदेश आणि पश्चिम बंगाल या राज्यांचा समावेश आहे. विशेष म्हणजे, तामिळनाडू, पुद्दुचेरी, केरळ आणि पश्चिम बंगालमध्ये 2026 मध्ये विधानसभा निवडणुका होणार आहेत. आसाममधील मतदार याद्यांच्या पुनरीक्षणाची घोषणा मात्र स्वतंत्रपणे केली जाईल.

27 ऑक्टोबरपासून याद्या गोठवल्या

ज्ञानेश कुमार यांनी स्पष्ट केले की, ज्या राज्यांमध्ये SIR ची प्रक्रिया सुरू होत आहे, तेथील सर्व मतदार याद्या 27 ऑक्टोबरच्या रात्री 12 वाजल्यापासून गोठवल्या जातील. या याद्यांच्या आधारे, प्रत्येक मतदान केंद्रावरील (ज्यामध्ये अंदाजे 1000 मतदार असतात) बूथ लेव्हल ऑफिसर (BLO) प्रत्येक मतदाराला एक विशेष गणना फॉर्म वितरित करेल. या फॉर्ममध्ये वर्तमान मतदार यादीतील सर्व आवश्यक तपशील असतील.

2003 च्या यादीत नाव असणाऱ्यांना दस्तऐवज नको

निवडणूक आयुक्तांनी एक मोठा दिलासा दिला आहे:

• स्वत:चे नाव: जर तुमचे किंवा तुमच्या पालकांचे नाव 2003 च्या मतदार यादीत (Electoral Roll) असेल, तर तुम्हाला कोणतेही नवीन दस्तऐवज जमा करण्याची गरज पडणार नाही.
• पालकांचे नाव: जर मतदाराचे नाव सध्याच्या सूचीत नसेल, पण त्यांच्या आई-वडिलांचे नाव 2003 च्या यादीत असेल, तरीही कोणतेही नवीन दस्तऐवज देण्याची आवश्यकता नाही.

2002 ते 2004 पर्यंतच्या SIR मतदार याद्या ECI च्या वेबसाइटवर (http://voters.eci.gov.in) उपलब्ध आहेत, जिथे कोणताही व्यक्ती स्वतःच्या नावाची पडताळणी करू शकतो.

मतदार यादीत नाव नसल्यास आवश्यक 10 कागदपत्रे:

जर मतदाराचे नाव सध्याच्या यादीत नसेल आणि ते 2003 च्या यादीशी जुळत नसेल, तर खालीलपैकी कोणतेही एक दस्तऐवज जमा करावे लागेल:

1. केंद्रीय/राज्य सरकार/सार्वजनिक उपक्रमाच्या नियमित कर्मचाऱ्याला/पेन्शनधारकाला जारी केलेले ओळखपत्र किंवा पेन्शन पेमेंट ऑर्डर.
2. 01.07.1987 पूर्वी भारत सरकार/स्थानिक प्राधिकरण/बँक/पोस्ट ऑफिस/एलआयसी/सार्वजनिक उपक्रमांनी जारी केलेले कोणतेही ओळखपत्र/प्रमाणपत्र/दस्तऐवज.
3. सक्षम प्राधिकरणाने जारी केलेले जन्म प्रमाणपत्र.
4. पासपोर्ट.
5. मान्यताप्राप्त मंडळ/विद्यापीठाने जारी केलेले मॅट्रिक/शैक्षणिक प्रमाणपत्र.
6. सक्षम राज्य प्राधिकरणाने जारी केलेले कायमस्वरूपी निवास प्रमाणपत्र.
7. वन अधिकार प्रमाणपत्र.
8. ओबीसी/एससी/एसटी किंवा सक्षम प्राधिकरणाने जारी केलेले जात प्रमाणपत्र.
9. राष्ट्रीय नागरिक रजिस्टर (जेथे उपलब्ध असेल).
10. सरकार द्वारा जारी केलेले कोणतेही जमीन/घर वाटप प्रमाणपत्र.

टीप: आयोगानुसार आधार कार्ड ऐच्छिक असेल.

पदाधिकाऱ्यांची भूमिका आणि जबाबदारी

निर्वाचक नोंदणी अधिकारी (ERO) आणि सहायक (AERO): प्राप्त झालेले सर्व गणना फॉर्म ड्राफ्ट रोलमध्ये समाविष्ट करणे; मागील SIR शी जुळत नसलेल्या मतदारांना नोटीस देणे; पात्रतेवर सुनावणी घेऊन अंतिम यादीत नाव समाविष्ट करणे किंवा वगळण्याचा निर्णय घेणे; तसेच कोणताही पात्र नागरिक वगळला जाणार नाही आणि कोणताही अपात्र व्यक्ती यादीत येणार नाही याची खात्री करणे. ERO हे उपजिल्हाधिकारी (SDM) स्तरावरील अधिकारी असतात.

बूथ लेव्हल ऑफिसर (BLO): प्रत्येक मतदाराला गणना फॉर्म वितरित करणे; मतदाराला 2002-2004 च्या यादीशी नाव जुळवण्यास मदत करणे; नवीन मतदारांसाठी फॉर्म 6 (Form 6) आणि घोषणापत्र गोळा करणे; शहरी आणि तात्पुरते स्थलांतरित झालेल्या मतदारांना फॉर्म ऑनलाइन भरण्यास मदत करणे; तसेच मृत, कायमस्वरूपी स्थलांतरित झालेले किंवा डुप्लिकेट नोंदणी असलेल्या मतदारांची ओळख करणे. गणना टप्प्यात गणना फॉर्म व्यतिरिक्त इतर कोणतेही दस्तऐवज गोळा न करण्याची सूचना त्यांना देण्यात आली आहे.