Indian YouTuber Detained: एका भारतीय युट्युबरसाठी दक्षिण कोरियाचा प्रवास अत्यंत भयावह अनुभवात बदलला आहे. प्रसिद्ध कंटेंट क्रिएटर सचिन अवस्थी याने आरोप केला आहे की, त्याला दक्षिण कोरियाच्या जेजू बेटावर इमिग्रेशन अधिकाऱ्यांनी प्रवेश नाकारला आणि तब्बल 38 तास एका डिटेंशन सेंटरमध्ये डांबून ठेवले. इतकेच नाही तर त्याला गुन्हेगारांसारखी वागणूक देऊन भारतात परत जाण्यास भाग पाडले.
तुरुंगासारखी वागणूक आणि मानसिक छळ
सचिनने इंस्टाग्रामवर आपली आपबिती शेअर करताना सांगितले की, जेजू बेटावर उतरल्यानंतर काही तासांतच त्याला ताब्यात घेण्यात आले. त्याला कोणत्याही स्पष्टीकरणाशिवाय एका खोलीत बंद करण्यात आले, जिथे सूर्यप्रकाशही पोहोचत नव्हता.
सचिनच्या दाव्यानुसार, त्यांना तिथे तुरुंगात दिले जाते तसे जेवण देण्यात आले आणि बाहेरच्या जगाशी संपर्क साधू दिला नाही. “त्यांनी आम्हाला गुन्हेगारांसारखी वागणूक दिली, ज्याचा आम्हाला कोणताही अधिकार नव्हता,” असे त्याने आपल्या पोस्टमध्ये नमूद केले आहे.
चीनमध्येही कडक पहारा आणि निर्बंध
दक्षिण कोरियातून परत येताना चीनमार्गे प्रवास करतानाही सचिनला अशाच त्रासाचा सामना करावा लागला. तिथेही त्याला सतत देखरेखीखाली ठेवण्यात आले होते. फोन वापरण्यावर बंदी होती आणि अन्न-पाण्याची योग्य सोय नव्हती. अत्यंत धक्कादायक बाब म्हणजे, स्वच्छतागृहात जातानाही पोलीस अधिकारी बॉडीकॅमसह सोबत येत असल्याचे त्याने सांगितले. या सर्व प्रकारामुळे तो आणि त्याचे सोबती पूर्णपणे मानसिकदृष्ट्या खचले होते.
महागडे तिकीट आणि जबरदस्तीने रवानगी
सचिनने असाही आरोप केला आहे की, अधिकाऱ्यांनी त्यांना तातडीने भारतात परत जाण्यासाठी प्रचंड महागडे तिकीट बुक करण्यास भाग पाडले. नेहमीच्या किमतीपेक्षा 10 पट जास्त पैसे देऊन त्यांनी परतीचे तिकीट काढले. “त्यावेळी आमच्याकडे वाद घालण्याची ताकद उरली नव्हती, आम्हाला फक्त तिथून सुखरूप बाहेर पडायचे होते,” असे त्याने सांगितले.
सचिनचे युट्युबवर 4 लाखांहून अधिक सबस्क्रायबर्स असून त्याच्या या पोस्टनंतर आंतरराष्ट्रीय प्रवासादरम्यान भारतीय पर्यटकांना मिळणाऱ्या वागणुकीबाबत सोशल मीडियावर मोठी चर्चा सुरू झाली आहे.
