Mumbai Airport Record : मुंबईतील छत्रपती शिवाजी महाराज आंतरराष्ट्रीय विमानतळाने (CSMIA) 21 नोव्हेंबर 2025 रोजी विमान वाहतुकीच्या व्यवस्थापनात एक नवीन ऐतिहासिक उच्चांक गाठला आहे. 24 तासांच्या कालावधीत विमानतळावर एकूण 1,036 विमानांची (विमानांचे आगमन आणि प्रस्थान) विक्रमी आवाजाही नोंदवण्यात आली.
यापूर्वी 11 नोव्हेंबर 2023 रोजी 1,032 विमानांची वाहतूक झाली होती. मुंबई एअरपोर्टने आपलाच जुना विक्रम मोडीत काढला आहे. ही कामगिरी देशातील सर्वात व्यस्त विमानतळांपैकी एक असलेल्या सीएसएमआयएची उत्कृष्ट कार्यात्मक क्षमता आणि कार्यक्षम कनेक्टिव्हिटी दर्शवते.
प्रवाशांच्या संख्येतही मोठी वाढ
विक्रमी विमान वाहतुकीसोबतच प्रवाशांच्या संख्येतही मोठी वाढ दिसून आली. 21 नोव्हेंबर 2025 रोजी सीएसएमआयए येथून एकूण 1,70,488 प्रवाशांनी प्रवास केला. हा आकडा 11 जानेवारी 2025 रोजी नोंदवलेल्या 1,70,516 प्रवाशांच्या विक्रमाजवळ पोहोचला आहे.
या दिवशी 755 देशांतर्गत (Domestic) विमानांनी सेवा दिली. 281 आंतरराष्ट्रीय विमानांनी सेवा दिली. एकूण प्रवाशांपैकी 1,21,527 प्रवासी देशांतर्गत, तर 48,961 प्रवासी आंतरराष्ट्रीय मार्गांवर प्रवास करत होते.
व्यस्त मार्ग आणि डिजिटल सुविधा
या विक्रमी दिवसात सर्वाधिक प्रवासी हालचाली दिल्ली, बंगळूरू, अहमदाबाद, हैदराबाद आणि कोलकाता या प्रमुख देशांतर्गत मार्गांवर नोंदवण्यात आल्या. आंतरराष्ट्रीय प्रवासासाठी मात्र दुबई, अबू धाबी, लंडन हीथ्रो, दोहा आणि जेद्दाह या ठिकाणांना जास्त मागणी होती.
सुरक्षितता, कार्यक्षमता आणि प्रवाशांचा अनुभव सुधारण्यासाठी सीएसएमआयएने सुरू केलेल्या डिजिटल सुविधा अत्यंत महत्त्वाच्या ठरल्या आहेत. सेल्फ-बॅगेज ड्रॉप युनिट्स, सेल्फ-चेक-इन किओस्क आणि डिजीयात्रा सारख्या तंत्रज्ञानाचा वापर उच्च ट्रॅफिक असतानाही अखंड प्रवासासाठी महत्त्वपूर्ण ठरला आहे.
हे देखील वाचा – Dhananjay Munde : ‘माझ्या एका सहकाऱ्याची उणीव जाणवते’; परळीच्या सभेत धनंजय मुंडेंना वाल्मिक कराडची आठवण
