Foreigners Arrested in India: भारताच्या राष्ट्रीय तपास संस्थेने म्हणजेच एनआयएने एका मोठ्या आंतरराष्ट्रीय कटाचा पर्दाफाश केला आहे. देशातील विविध विमानतळांवरून ७ परदेशी नागरिकांना दहशतवादी कारवायांच्या संशयावरून बेड्या ठोकण्यात आल्या आहेत.
यामध्ये १ अमेरिकन आणि ६ युक्रेनियन नागरिकांचा समावेश असून, त्यांच्यावर बेकायदेशीर कृत्य प्रतिबंधक कायद्यांतर्गत कारवाई करण्यात आली आहे. न्यायालयाने या आरोपींना २७ मार्चपर्यंत कोठडी सुनावली आहे.
आरोपींची ओळख आणि पार्श्वभूमी
अटक करण्यात आलेल्या अमेरिकन नागरिकाचे नाव मॅथ्यू आरोन वॅन डायक असून तो स्वतःला युद्ध वार्ताहर आणि सुरक्षा विश्लेषक म्हणवतो. २०११ च्या लिबिया गृहयुद्धातही तो चर्चेत आला होता. त्याने ‘सन्स ऑफ लिबर्टी इंटरनॅशनल’ नावाची संस्था स्थापन केली असून, ती संघर्षग्रस्त भागातील स्थानिक सशस्त्र गटांना लष्करी प्रशिक्षण देते.
त्याच्यासोबत अटक करण्यात आलेल्या ६ युक्रेनियन नागरिकांची नावे हुर्बा पेट्रो, स्लिव्हियाक तारास, इव्हान सुकमानोव्स्की, स्टेफनकीव्ह मारियान, होनचारुक मक्सिम आणि कामिन्स्की व्हिक्टर अशी आहेत.
नेमका आरोप काय आहे?
एनआयएच्या दाव्यानुसार, या टोळीने खालीलप्रमाणे गंभीर गुन्हे केले आहेत:
- बेकायदेशीर प्रवेश: हे नागरिक वैध व्हिसावर भारतात आले असले, तरी त्यांनी परवानगिशिवाय मिझोरामसारख्या प्रतिबंधित क्षेत्रात प्रवास केला.
- ड्रोन तस्करी: युरोपमधून मोठ्या प्रमाणात ड्रोन मागवून ते भारतातून म्यानमारमधील बंडखोर गटांपर्यंत पोहोचवल्याचा त्यांच्यावर आरोप आहे.
- दहशतवादी गटांशी संबंध: म्यानमारमधील सशस्त्र गटांना प्रशिक्षण देणे आणि भारताच्या ईशान्येकडील सुरक्षिततेला धोका निर्माण करणाऱ्या संघटनांना मदत केल्याचा दावा तपास यंत्रणेने केला आहे. हे आरोपी एके-४७ रायफलधारी दहशतवाद्यांच्या थेट संपर्कात होते, असेही समोर आले आहे.
आंतरराष्ट्रीय प्रतिक्रिया
या अटकेनंतर राजनैतिक वर्तुळात खळबळ उडाली आहे. अमेरिकन दूतावासाने गोपनीयतेचे कारण देत अधिक भाष्य करण्यास नकार दिला आहे. तर युक्रेनने या प्रकरणावर तीव्र प्रतिक्रिया दिली असून, त्यांच्या नागरिकांविरुद्ध अद्याप कोणतेही ठोस पुरावे सिद्ध झालेले नाहीत, असा दावा केला आहे.
तसेच, भारताने आंतरराष्ट्रीय नियमांनुसार या अटकेची अधिकृत माहिती दिली नसल्याचा आरोपही युक्रेनने केला आहे.
ईशान्य भारताच्या सुरक्षेच्या दृष्टीने हा खटला अत्यंत महत्त्वाचा मानला जात असून, एनआयए आता या कटाचे मूळ शोधण्यासाठी तांत्रिक डेटा आणि सोशल मीडिया खात्यांची कसून चौकशी करत आहे.
