North Korea on Iran-Israel Conflict | इराण-इस्त्रायलच्या संघर्षला एक आठवड्यापेक्षा अधिक काळ झाला आहे. दोन्ही बाजूने जोरदार प्रत्युत्तर दिले जात असून मोठ्या प्रमाणात जीवितहानी झाली आहे. आता उत्तर कोरियाने इराणवरील इस्त्रायलच्या हवाई हल्ल्यांचा तीव्र शब्दांत निषेध केला आहे.
उत्तर कोरियाने इस्त्रायलला शांततेसाठीचा कॅन्सर असल्याचे म्हटले आहे. उत्तर कोरियाची सरकारी वृत्तसंस्था ‘केसीएनए’ने या हल्ल्यांना ‘घृणास्पद आक्रमण’ असे संबोधत, पश्चिम आशियातील शांततेसाठी ते धोकादायक ठरत असल्याचा दावा केला. अमेरिका आणि पाश्चिमात्य देशांच्या पाठिंब्यामुळे इस्त्रायलने इराणसोबतच्या संघर्षाला चालना दिली आहे, ज्यामुळे मध्य पूर्वेतील स्थैर्य धोक्यात आले आहे, असे उत्तर कोरियाच्या वृत्त संस्थेने म्हटले आहे.
इस्त्रायल: मध्य पूर्वेतील शांततेसाठी धोका
उत्तर कोरियाच्या परराष्ट्र मंत्रालयाने इस्त्रायलला ‘मध्य पूर्वेतील शांततेसाठी कॅन्सरसारखी संस्था’ असे संबोधले आहे. प्रवक्त्याने म्हटले की, अमेरिका आणि पाश्चिमात्य देशांच्या समर्थनामुळे इस्त्रायल जागतिक शांतता आणि सुरक्षेला हानी पोहोचवत आहे. इराणवरील हल्ले हे एका सार्वभौम राष्ट्राच्या स्वायत्ततेचे आणि प्रादेशिक अखंडतेचे उल्लंघन आहे, जे ‘मानवतेविरुद्धचा अक्षम्य गुन्हा’ आहे.
उत्तर कोरिया आणि इराण यांच्यात 1973 पासून राजनैतिक संबंध आहेत आणि दोन्ही देश शस्त्र कार्यक्रमांमुळे आंतरराष्ट्रीय निर्बंधांना सामोरे जात आहेत.
इस्त्रायलचे हल्ले आणि इराणचे प्रत्युत्तर
इस्त्रायलच्या हवाई दलाने सांगितले की, त्यांनी इराणच्या क्षेपणास्त्र निर्मिती क्षमतेला लक्ष्य केले असून, तेहरान आणि इराणच्या इतर भागांमध्ये हल्ले सुरू आहेत. दुसरीकडे, इराणच्या इस्लामिक रिव्होल्यूशनरी गार्ड कॉर्प्सने तेहरानवर हवाई संरक्षण प्रणाली सक्रिय केल्याचे सांगितलेया हल्ल्यांमध्ये लष्करी ठिकाणे, पायाभूत सुविधा आणि निवासी इमारतींना लक्ष्य करण्यात आले, ज्यामुळे अनेक रहिवाशांनी पलायन केले.
