Gig Workers Strike: ओला, उबर आणि रॅपिडो सारख्या कंपन्यांशी जोडलेल्या गिग वर्कर्सनी (अॅप-आधारित चालक) शनिवारी, ७ फेब्रुवारी रोजी देशव्यापी संप पुकारला आहे. भाडे नियंत्रण आणि सरकारी नियमांची कडक अंमलबजावणी व्हावी, या मागणीसाठी हा संप केला जाणार आहे. तेलंगणा गिग आणि प्लॅटफॉर्म वर्कर्स युनियनच्या नेतृत्वाखाली हा लढा पुकारण्यात आला असून, देशातील विविध राज्यांमधील चालक यामध्ये सहभागी होणार आहेत.
६ तास सेवा राहणार ठप्प
युनियनने दिलेल्या माहितीनुसार, शनिवारी ६ तासांसाठी ‘ऑल इंडिया ब्रेकडाऊन’ पाळला जाईल. यादरम्यान चालक आपले मोबाईल अॅप्स ‘ऑफलाईन’ ठेवतील. कंपन्यांकडून भाडे ठरवताना पारदर्शकता पाळली जात नाही आणि चालकांच्या उत्पन्नावर याचा मोठा परिणाम होत आहे, असा आरोप युनियनने केला आहे. ‘मोटार वाहन ॲग्रीगेटर मार्गदर्शक तत्त्वे २०२५’ असूनही कंपन्या आपल्या सोयीनुसार भाडे ठरवत असल्याचे चालकांचे म्हणणे आहे.
प्रमुख मागण्या काय आहेत?
१. सरकारने किमान मूळ भाडे (Base Fare) निश्चित करावे. २. व्यावसायिक प्रवासासाठी खाजगी वाहनांचा (Private Vehicles) होणारा वापर थांबवावा. ३. कामाच्या ठिकाणी उत्तम सोयी-सुविधा आणि उत्पन्नाची स्थिरता मिळावी.
गिग वर्कर्सची वाढती संख्या आणि उत्पन्न
३० जानेवारी रोजी प्रसिद्ध झालेल्या आर्थिक पाहणी अहवालात (Economic Survey 2025-26) या क्षेत्रातील वाढत्या चिंतेवर प्रकाश टाकण्यात आला आहे. अहवालानुसार:
- भारतातील ४० टक्के गिग वर्कर्सचे मासिक उत्पन्न १५,००० रुपयांपेक्षा कमी आहे.
- २०२१ मध्ये ७७ लाख असलेले कामगार २०२५ मध्ये १.२ कोटींवर पोहोचले आहेत.
- एकूण भारतीय कार्यबलामध्ये या कामगारांचा वाटा आता २ टक्क्यांहून अधिक आहे.
यापूर्वी ३१ डिसेंबर रोजी अन्न वितरण (Food Delivery) आणि क्विक कॉमर्स प्लॅटफॉर्मच्या कामगारांनीही कमी मोबदल्याच्या निषेधार्थ आंदोलन केले होते. आता ७ फेब्रुवारीच्या संपामुळे प्रवाशांना कॅब किंवा बाईक टॅक्सी मिळवण्यात अडचणी येऊ शकतात, विशेषतः कामाच्या वेळेत या संपाचा मोठा परिणाम जाणवू शकतो.
