PM Modi : पंतप्रधान नरेंद्र मोदी यांनी आज राज्यसभेत राष्ट्रपतींच्या अभिभाषणावरील ‘धन्यवाद प्रस्तावा’ला उत्तर देत भाषणाला सुरवात केली. पंतप्रधानांच्या भाषणादरम्यान विरोधी पक्षाच्या सदस्यांनी जोरदार घोषणाबाजी करत सभागृहाचे कामकाज विस्कळीत करण्याचा प्रयत्न केला. “हुकूमशाही चालणार नाही” आणि “राहुल गांधींना बोलू द्या” अशा घोषणांनी सभागृह दणाणून गेले होते. या गदारोळावर उपरोधिक टिप्पणी करत पंतप्रधान मोदी म्हणाले की, “मल्लिकार्जुन खरगेजींचे वय आणि प्रकृती लक्षात घेता, त्यांना किमान बसून घोषणा देण्याची सवलत देण्यात यावी.” विरोधकांच्या गोंधळातही पंतप्रधानांनी आपले भाषण सुरू ठेवत सरकारच्या धोरणांचा बचाव केला.
लोकसभेतील अभूतपूर्व प्रसंग आणि सुरक्षेची चिंता बुधवारी लोकसभेतही एक अत्यंत गंभीर आणि अनपेक्षित प्रसंग ओढवला. संध्याकाळी ५ वाजता पंतप्रधानांचे भाषण अपेक्षित असताना, विरोधी पक्षाच्या महिला खासदारांनी थेट सत्ताधारी बाकांकडे धाव घेत पंतप्रधानांच्या खुर्चीला घेराव घातला. खासदारांच्या हातात “जे योग्य आहे, ते करा” असे फलक होते, जे ८ विरोधी खासदारांच्या निलंबनाचा निषेध करत होते. या गोंधळामुळे अध्यक्ष ओम बिर्ला यांनी पंतप्रधानांचे भाषण पुढे ढकलण्याचा निर्णय घेतला. “सभागृहात पंतप्रधानांच्या संदर्भात काहीतरी अनपेक्षित आणि अप्रिय घडू शकले असते,” असे गंभीर निरीक्षण अध्यक्षांनी नोंदवले. विशेष म्हणजे, २००४ नंतर प्रथमच लोकसभेत राष्ट्रपतींच्या अभिभाषणावरील प्रस्ताव पंतप्रधानांच्या भाषणाशिवाय मंजूर करण्यात आला.
जागतिक व्यापारात भारताची वाढती विश्वासार्हता आपल्या भाषणात पंतप्रधानांनी भारताच्या आर्थिक आणि व्यापार धोरणांवर प्रकाश टाकला. ते म्हणाले की, अलीकडच्या काळात विविध पक्षांच्या शिष्टमंडळांनी जेव्हा जागतिक दौरे केले, तेव्हा त्यांना भारताप्रति असलेल्या आदराची प्रचिती आली. “आज जग भारताला आपल्या समान दर्जाचे मानते. आम्ही एमएसएमई (MSME) क्षेत्रावर दिलेला भर आणि अमेरिकेसोबत झालेला व्यापार करार यामुळे जागतिक स्तरावर भारताचा विश्वास वाढला आहे,” असे त्यांनी नमूद केले. या व्यापार करारांचा सर्वाधिक लाभ देशातील तरुणांना होणार असून, त्यांच्यासाठी आता संपूर्ण जागतिक बाजारपेठ खुली झाली आहे, असा विश्वास त्यांनी व्यक्त केला.
काँग्रेसवर प्रहार-
दूरदृष्टीचा अभाव आणि धोरणहीनता पंतप्रधान मोदींनी काँग्रेसच्या जुन्या कार्यपद्धतीवर सडकून टीका केली. ते म्हणाले की, काँग्रेसच्या काळात देशाकडे ना कोणती दूरदृष्टी होती, ना ठोस विचार आणि ना प्रबळ इच्छाशक्ती. लाल किल्ल्यावरून काँग्रेसच्या पंतप्रधानांनी दिलेल्या भाषणांचे विश्लेषण केल्यास, त्यांनी देशाला प्राधान्य देण्याऐवजी केवळ मतांचे राजकारण केल्याचे स्पष्ट होते. “त्यांच्या काळात झालेल्या चुका सुधारण्यातच आमची बरीच ऊर्जा खर्च होत आहे. जगाच्या नजरेत भारताची प्रतिमा सुधारण्यासाठी आम्हाला कठोर परिश्रम करावे लागत आहेत,” असेही ते म्हणाले.
सुधारणा आणि कामगिरीचे नवे सूत्र-
भारताच्या भविष्याबद्दल बोलताना पंतप्रधानांनी ‘सुधारणा आणि कामगिरी’ (Reform and Perform) या सूत्राचा पुनरुच्चार केला. आज देश एका निश्चित धोरणावर चालत असून, त्यामुळेच जागतिक गुंतवणूकदार भारताकडे आकर्षित होत आहेत. काँग्रेसच्या काळात निर्माण झालेल्या उत्पादन परिसंस्थेतील त्रुटी दूर करून, आता भारत जगाशी स्पर्धा करण्यास पूर्णपणे सज्ज झाला आहे. भविष्याचा वेध घेणाऱ्या धोरणांमुळेच आज भारताची अर्थव्यवस्था अधिक बळकट आणि आत्मनिर्भर होत असल्याचा दावा पंतप्रधानांनी आपल्या भाषणात केला.
